UN DISCU: «Gigliola Cinquetti y Los Panchos«. Güei yá naide s’alcordará de la gran Gigliola, pero a lo llargo unos años (los 60 y los 70) fue una de les cantantes más populares de música llixera. La fama llegó-y bien ceo, pues con 16 añinos gana’l famosu Festival de San Remo con una canción que yá va acompañala pel restu la so carrera: «Non ho l’etá (para amarti)«. Y yera verdá, pues con esos años y nesa dómina, nun tenía edá pa querer a naide. D’aquella voz de moza adolescente, fue camudando hasta facese una gran cantante con un rexistru perguapu. Nesti discu colos sempiternos, y siempre cumplidores Panchos, demuéstralo bordando un piñu de melodíes clásiques como son «Adios pampa mía», «Quizás, quizás, quizás», «Lisboa antigua«… Pero a min les dos que más me presten, y nes que canta inmeyorablemente son «Johnny Guitar» (de la peli del mesmu títulu, un clásicu del western) y «Amar y vivir» la guapísima canción de Consuelo Velazquez de la que fai una interpretación modélica. Un discu pa esfrutar de bona música, mientres planches la colada o pienses nos cordobeyos.
