Acaben de fallase, por parte de la Conseyería d’Educación, Cultura y Deporte, les Subvenciones a la edición de llibros n’asturianu y gallego-asturianu. Nes páxines del BOPA vienen detallaes les editoriales que les solicitaron y la estremada suerte que corrieron los llibros presentaos. Como ye mui ciertu’l refrán asturianu de, «onde nun hai panchón toos riñen y toos tienen razón», munches editoriales protesten pola cantidá de rechazos a obres interesantes que, por unos presupuestos cada vuelta más escasos, tienen que quedar nel caxón. Nel mio casu, como autor, tamién me siento afectáu pues dos llibros míos que se presentaren (un trabayu d’investigación lliteraria por parte de TRABE, y otru infantil por PINTAR-PINTAR) dambos fueron rechazaos, quiero creyer que non pola calidá, sinón por eso dicho enantes de los presupuestos mínimos. Por cierto, aprovecho pa ofrecelos a cualquiera que quiera editalos ensin subvención (esto ye publicidá, claro)
Pero, en cualquier casu, esti sistema de subvencionar dando unes perres, poques, a fondu perdíu, nun ye lo más afayadizo. Da la impresión que se trata d’una llimosna que s’entrega a los editores, pa xustificar que se faen coses en
favor de la llingua. Y nun debiere ser asina. N’otros sitios les coses nun se faen d’esi mou. Lo que daveres resulta más xusto y efeutivo ye que l’editor edite los llibros que-y paezan más interesantes y que, llueu, l’alministración merque un ciertu númberu d’exemplares. Exemplares que debiere comprometese a facer llegar a biblioteques, colexos, o llugares onde se visualicen, se llean y s’aprovechen.
Nun sé cuál ye’l criteriu actual pa dar unes subvenciones y negar otres, pero seya cual seya esi criteriu, la impresión que da ye que nun tien nada que ver cola calidá de los llibros y sí col fechu de querer contentar a toos, espurriendo una cantidá mínima de dineru a mou de dádiva. Llamentablemente la cultura tien de ser subvencionada si nun queremos qu’esapaeza, y muncho más si esa cultura pertenez a una llingua marxinada, fuera de los circuitos comerciales y de los grandes medios de mases. Les llibreríes que trabayaben col llibru asturianu, yá zarraron. Delles editoriales van camín d’ello. Si la lliteratura en llingua asturiana llega a esapaecer, y pa ello vamos, esapaecerá tamién la propia llingua que la vehicula. Igual ye eso lo que se pretende. O seya que, o se toma la cosa en serio y se ponen los medios necesarios, o llueu vendrán les llamentaciones de «yo nun sabía…», «yo nun quería…» Los escritores cumplimos la nuestra parte, escribiendo. Les editoriales presentando proyeutos interesantes. Agora falta que l’alministración cumpla tamién la so parte axudando de mou intelixente a la edición, y distribuyendo y promocionando llueu los llibros pa que nun queden nel armariu. Y si daveres-yos paez que nun hai perres pa ello, que les quiten d’eses instituciones culturales faraóniques, como’l Niemeyer o la Llaboral Centru d’Arte, onde entierren munchos miles d’euros, pa dalgo que poco tien que ver cola verdadera cultura del país. Pero, claro, esi ye un xuguete que se ve muncho nel escaparate.
