close
Taba yo planchando…

Taba yo planchando…

Taba yo esti día planchando, y nun tenía’l cuerpu pa munches allegríes. Yera 23 de mayu y ente les alcordances y determináu futuru inciertu, la cabeza nun daba pa muncho más. Na radio nun daben nada curioso, nun tenía ganes de poner un discu y diome por prender una «tele» piquíñina, como diría Jerónimo Granda, qu’avezo a tener apagada. Tenía puesta la 2, esa cadena na qu’entovía, de xemes en cuando, pues ver dalgún programa curiosu o dalguna película que nun seya americana. Taben echando un documental sobre la vida y la obra del gran Gil de Biedma: «H.oder -dixi yo pa mi porque amás taba solu- ésti ye’l que me faltaba pal duru». Pero igual yera que me lo pidía l’ánimu, o yeren ganes de fadiar, pero dexélo siguir, echando una güeyada pa la «tele» y otra pa les camises, nun fuera’l demoniu que… El programa fue una maravía que recoyó fielmente, tolo fielmente que yo soi a aldovinar, el camín vital y lliterariu de don Jaime, exaguáu pola intervención de munchos de los que fueron los sos amigos: Marsé, Caballero Bonald, Ana María Moix, les sos hermanes y otros familiares, Castellet, Balcells, nun sé, dalgunos más. Ente medies, una llarga y vieya entrevista col autor. Too mui prestoso. Recomiendo vela na páxina web de TVE en cuantes la cuelguen, porque entovía nun ta. Y xunto a la pallabra, tamién la música. Una cantautora de la que nun recuerdo’l nome cantó un poema, y l’espléndidu Miguel Poveda, qu’igual canta copla, que boleros, que flamenco, interpretó’l famosísimu «No volveré a ser joven», el poema que según el propiu Biedma más-y prestaba de tolos qu’escribiere. Esi final de l’adolescencia d’un paisano de trenta y tantos años que yá nun yera adolescente. Como recuerdu d’esa tarde buxa y murnia, reproduzo equí’l poema na guapa versión de Poveda: