Don Joaquín Fernández García yera’l xefe d’hematoloxía del Hospital de Cabueñes, en Xixón, y taba recién xubiláu. Creo que diba pa un añu y mediu o cosa asina. La xente que lu conoció na so fastera profesional fala siempre bien d’él, como persona y como mélicu, y la esperiencia familiar que yo tengo, nel tratamientu del mio suegru, nun merez más qu’allabancies. Pero de lo que si puedo falar en primer persona ye de la otra fastera importante que desendolcaba na so vida. La d’etnógrafu, folklorista y escritor.
Don Joaquín Fernández escribía los sos trabayos indistintamente n’asturianu o castellán, y dambes llingües les remanaba con soltura y conocencia. N’Asturianu son mui conocíos varios de los sos llibros pa neños y rapazos, como «Fito y los gorretinos», o «Coses d’osos», y tamién les sos frecuentes collaboraciones nes «Xornaes d’Estudiu» de l’Academia, que llueu se convertíen n’interesantes artículos apaecíos en «Lletres Asturianes».
Yo tengo, amás, una deuda personal con elli. Na mio novela en castellán, «Las aventuras de Inés Saldaña y de cómo ayudó a Colón a descubrir América«, sal un personaxe mui importante pal argumentu que ye un Ensalmador asturianu, de nome Teódulo de Villarroel, col que la mocina protagonista va a deprender l’oficiu de sanadora. Pues bien, les carauterístiques del personaxe y dalgún de los conxuros que realiza, tán sacaos del llibru de don Joaquín Fernández: «Curanderos y santos sanadores: curanderismo y medicina popular en Asturias», de la editorial GEA , y asina-y lo tengo reconocío na Nota final qu’acompaña a la novela, onde figura’l mio agradecimientu.
Poro, Asturies pierde d’una tacada a un gran mélicu, a un notable escritor y folklorista y a una bona persona. Ye muncha perda pa una sola vez. Que la tierra-y seya leve.
