Alcuérdome cuando Victoria Fernández me dixo que dexaba Asturies p’asitiase en Cataluña onde tenía un proyeutu lliterariu mui guapu. Fue mui valiente, porque dexaba equí munches coses bien feches y tenía yá un nome que yera garantía de seriedá y trabayu. Pero’l mundu, sobre too’l lliterariu, requier de persones como ella audaces y ensin mieu a entamar nueves actividaes anque seya lloñe de la so tierra. “Que no hagan callo las cosas, ni en el cuerpo ni en el alma…” decía’l poeta León Felipe va yá munchu tiempu. Pasar por too una vez na vida. Otros seguro que nun somos tan valientes.
El casu fue qu’ellí, per tierres catalanes, llogró llevantar esi guapu proyeutu que yera na menos que fundar una revista de lliteratura infantil y xuvenil, el CLIJ, «Cuadernos de Literatura Infantil y Juvenil». Corría l’añu 1988. Si cualquier revista lliteraria tien problemes de caltenimientu y un futuru inciertu, maxinemos si pa encima’l tema que trata vien arreyáu a los llibros pa neños y neñes, esi mundu tan cambiante y que depende de tan estremaos elementos: padres y madres, profesores, colexos, editoriales que van y vienen, los propios neños que cada vuelta camuden el llibru por otros entretenimientos menos “trabayosos”, la tele, los móviles, internet… Porque lleer ye un esfrute, pero tamién ye un trabayu, un vezu, una costume na qu’hai qu’esforciase porque cuesta lleer y cuesta comprender, como revelen les abondes encuestes que faen los especialistes d’estes coses.
El casu ye que’l proyeutu salió p’alantre gracies al esfuerciu y la intelixencia de la so direutora y de la xente na que supo apoyase, y asina esti mes sal a la lluz el númberu 300 que correspuende al añu 34, que son los que lleva publicándose la revista. Tuve la pergrande suerte de que Victoria contó conmigo dende l’aniciu de la idea pa que-y echara una manina. Pequeña, pero qu’ehí está. Como suscriptor dende’l primer númberu, hasta ayudala a organizar una presentación en Xixón de la revista (nos llocales del Atenéu Obreru, pa más señes) pasando por unes cuantes collaboraciones lliteraries que s’espurren dende el primer añu, nel qu’ellí publiqué dos trabayos, hasta el pasáu númberu en que asoleyé un interesante estudiu (creo) sobre la discriminación de xéneru na LLIX asturiana. Pola so parte ella nun fizo como otros qu’al colar de la so patria escaécense d’ella. A la escontra, siempre tuvo en cuenta a la nuestra lliteratura, inxertándola entre les otres llingües peninsulares pese a nun ser oficial, cosa que sé que-y valió dalguna crítica y comentariu adversu. A ella nun-y importó, tolo contrario, túvolo siempre a arguyu.
Por too ello, nun me queda más que felicitar a l’aventurera xixonesa polos ésitos conseguíos y por saber da-y continuidá al proyeutu trespasando la direición executiva a manes del so fíu Gabriel, anque acoricando pa sigo un espaciu importante nes decisiones de la revista. ¡Norabona, Victoria! Y que’l “nuestru” CLIJ cumpla munchos númberos más.
