El sábadu pasáu, 17 d’Avientu, cellebróse nos llocales de LLABORAL CENTRO DE ARTE, la I Convención d’Escritores de Fantasía, Terror y Ciencia-Ficción d’Asturies (AsturCON). Ello yera tanto pa los qu’escriben n’asturianu como los que lo faen en castellán. Participaron tamién un piñu d’editoriales y coincidió cola selmana de la Feria d’Artesanía lo que fizo qu’hubiere, en tol circuitu, un ambiente mui prestosu, animáu y cuasi folixeru, lo que nun quitó pa la seriedá de les cinco meses redondes que se fexeron a lo llargo tol día.
Nel trescursu de la mañana, cuasi como primer actu, fízoseme entrega del Primer Premiu «Fontenebrosa» (imaxe perguapa qu’encabeza esti post) pola mio llabor precursora al rodiu de la Fantasía n’Asturies. Más concretamente pola triloxía de Fontenebrosa, anque tamién tengo otros munchos llibros al respeutu, como la novela «Memoria de los Cimeros» o los cuentos recoyíos n’ «El norte», ente otros más. Tengo d’agradecer a los organizadores que pensaren en perpetuar el nome de la mio obra más querida, como futuru premiu pa noveles que cinquen a esos temes que nos ocupen: la Fantasía, El terror y la Ciencia-Ficción. Ye verdá que, hasta va pocu tiempu, estos yeren temes marxinales, de serie B y dafechamente minusvaloraos. Había los llibros «serios», y llueo too eso otro que yera como un poco «friki». Lo que yo llamo «lliteratura de kioscu», ensin atalantar que nesa lliteratura de kioscu llegaron munchos de lo que llueu fueron clásicos: Verne, Wells, De Foe, Stevenson, Conrad, Melville… Ensin embargu, naide podría discutir agora’l valir social, nun sólo lliterariu, d’obres como «1984», d’Orwell, «El cuentu de la criada» de Margaret Atwood o «El mundu sumerxíu» de Ballard. Toos ellos, y otros munchos, denuncien situaciones que tán dándose agora con esa previsión que sólo tienen los xenios. Y toi seguru de qu’Isaac Asimov tará riéndose na so tumba al ver l’ésitu de la Intelixencia Artificial y como la so serie de «Yo robot» ta de moda nel mundu la investigación, la industria y hasta la vida doméstica.
Por too ello, y más que se pudiere amestar, toi mui agradecíu a los organizadores qu’idearon lo de poner el nome de «Fontenebrosa» al nuevu premiu que, agora, yo encabezo. Pero sobre too, al marxe del nome, lo verdaderamente importante ye la propia creación d’un premiu que vien a enllenar un furacu qu’había na nuestra lliteratura, onde hai premios pa cuasi too. Ésti qu’acueye a la Fantasía, la Ciencia-Ficción y el Terror va a alendar a munchos escritores a escribir sobre esos temes, cola seguranza de que van tener una salida editorial y de publicu. Poro, felicitaciones a los entamadores del eventu y a los creadores del premiu. Seguro que, nel futuru inmediatu, van tener un bon ésitu.
P.D.- Por eses casualidaes que tien la vida, y la lliteratura ye una parte d’ella, el primer tomu de «Fontenebrosa, el reinu de los Silentes» publicóse en 1984. Seguro que cuando Orwell tituló asina la so obra más famosa nun pensó que nesa fecha, nun remotu llugar llamáu Asturies, dalguién taría escribiendo una obra de fantasía nuna llingua que nun esiste. De xuro que-y entraría la risa.
