Cuando la realidá socio-política ye tan abegosa, repititiva, aburrida y aborrecida como ésta, nun cabe meyor abellugu, pa principiar bien l’añu, que la lliteratura. Dame igual que seya d’eso que despeutivamente llamen «d’evasión», como si esi axetivu fuere dalgo malo. En definitiva tola lliteratura ye un mou d’evasión, inclusive esa que llamen «comprometida». Ún «evádese» cuando sal del so cuerpu, de la so vida, de les rutines diaries pa vivir/lleer otres histories, sean estes más o menos «comprometíes», más o menos «reales» (¡pero tola lliteratura ye ficción…!)
Estes feches, cafiantes y al tiempu señaldoses, valen pa delles coses: ver a la familia llonxana, pasate un poco más de pesu y, nel mio casu, atropar un balagar de llibros nuevos que toos me regalen, en llugar de los calcetos o calzonciellos que ya ordené «pasar pela quilla». Asina que, anque yo soi más de Reis Magos que del paisanón de la barba blanca, aceuté de mui bon grau los regalos que, en forma llibros, me ficieron hasta agora (espero por más). Lo primero una prestosísima sorpresa: una fotocopia del manuscritu orixinal d'»Alicia nel País de les Maravíes», de Lewis Carroll, colos dibuxos del propiu autor, que se conserva nel Muséu Británicu. El cómo se fizo l’autora del regalu con elli ye cosa qu’ignoro porque sé que nun ye xera fácil. El casu ye que yá tengo na mio bibliioteca «A Chirstmas gift to a Dear child in memory of a Summer Day».
Del restu los regalos/llibros, la «Historia de las tierras y los lugares legendarios», d’Umberto Eco, que tien una pinta perbona; «La última noche», del muy interesante James Salter, del que namás lleí «Pilotos de caza» y que tien poca obra pero con mui bones crítiques y «La teología feminista en la Historia», de Teresa Forcades, de la que falaré otru día porque paga la pena. A ver si pa lo de los Magos dalguién me pon al Kavafis de Gago porque sinón voi tener que mercalu yo. Y pa los rapazos el d’Asterix, n’edición n’asturianu y asina écho-y una güeyada. En fin, por llorar que nun quede. De too ello daré cuenta nesti blogue cuando-yos llegue’l turnu, porque enantes hai otres coses en llista espera y nun suelo facer trampes cuando se trata de lliteratura. Los autores, a priori, merecen un respetu. Depués… depende d’ellos.
