Tengo dicho munches veces, y ye que ún termina por repetise, que’l «productu» lliterariu n’asturianu, o seya, el llibru en sí mesmu, ta meyorando ca día y algamando un altor de calidá mui notable. El fallu vien, llueu, per otros llaos: esi productu nun acaba llegar al públicu al que debería dir empobináu, pero d’eso yá falé n’otru momentu. Pa amosar qu’eso ye verdá, por si ficiera falta, sal estos díes un llibru perguapu tituláu «Vivo nuna casa malva». La conxunción de tres elementos, la prosa cenciella y guapísima d’Iris Diaz Trancho; los suxerente dibuxos de Feliciano García Zecchin; y la calidá de la edición de Pintar-Pintar, ufierten a los llectores asturianos un llibru exemplar. Y emplego esta pallabra porque la intención de les tres partes (anque’l méritu primeru, claro, ye’l de l’autora de la idega) nun ye sólo publicar un llibru más pa neños, sinón que se trata de la «mini-historia» d’un neñu d’una casa d’acoyida. Un guah.e, pues, con problemes que vive con una má, tamién con problemes. La casa malva ye, entós, l’abellugu, la seguridá. De dala manera, el Llar. Iris, con mui poques pallabres, namás les esenciales, ye capaz de tresmitir los sentimientos d’esi neñu que ye consciente de que ta a salvo. De que’l mundu de fuera nun ye a mancalu: «Tengo una casa. Mio ma tien una casa. Yá nun tamos fuera. Naide nos mira. L’agua nun me toca. El fríu nun llega cola nueche.» Y con esa constatación que se fai’l neñu, termina viendo la vida col color de la esperanza, que nesti casu ye’l malva.
Llibru guapísimu pa toles edaes, que si se publicare en cualquier otra comunidá con llingua propia tendría un reconocimientu popular amplísimu. Esperemos qu’equí, anque seya atendiendo a razones «estra-lliteraries», tamién lu tenga. Y, yá pa finar, una recomendación «a quien correspuenda». Hai una doble edición del llibru, castellano-asturianu. Sedría una ocasión inmeyorable pa que la nuestra llingua, con esi vehículu tan prestosu, fendiera dalgunes de les estorbises que tien nes alministraciones públiques, llocales y autonómiques, y se convirtiere nuna tarxeta de presentación pa dar a conocer l’asturianu más alló de les nuestres llendes.
