Nun sé que númberu d’orden tien el llibrín que toi comentando porque la editorial “Bajamar/Baxamar”, que dirixe con ciñu y dedicación l’amigu César (Pascual Ortiz), tien una produición tan bayurosa que ye imposible determinalo, más nesti casu nel que nun figura na parte esterior. Da igual. Caún d’ellos ye un universu en sí mesmu, al marxe de que forme parte d’una coleición. Una coleición, en castellán o n’asturianu, de poesía. Ye verdá qu’hai tamien dalgún “versu llibre”, o versu que va por llibre, como’l mio llibru “Un cartuchu d’Olivines”, que fue un caprichu del editor pola amistá que nos xune.
Esti “Migas de pan” del que toi falando, vien firmáu por Alfonso García Rodríguez, al que conozo dende neñu y del que nun sabía qu’escribía, y seguro qu’él tampoco, porque esti ye’l so primer llibru de poesía publicáu. Investigador, archiveru y persona dotada d’un finu sentíu del humor, ufiértanos nesta primera entrega poética un llibru deliciosu. A medies ente la poesía y la greguería, ente l’intimismu y la naturaleza, Alfonso percuerre una serie de sentimientos y sensaciones (que ñidiamente nun son lo mesmo) utilizando un llinguax cenciellu enllenu de señaldá, como si, pese a la so xuventú, viniere yá de vuelta de munches coses. L’amor, la soledá, el tiempu que pasa… son temes recurrentes en munchos poetes, pero Alfonso García Rodríguez trátalos como si estuviere xugando con ellos. Con un ciertu desapegu poéticu, como si punxere sordina a la cuenta de Pérdides y Ganancies porque cuasi siempre les cuentes sáldense dando pérdides. Ye una prestosidá la llectura d’estos pequeñísimos poemes, que baillando colos tres versos nun presumen de ser haikus. Lliteratura entrañable enllena d’esa difícil facilidá que da, non l’aparentar ser poeta, sinón el vivir siéndolo. Norabona a Alfonso, dignu fíu de so padre José Ramón, y norabona a César esi gran editor qu’enaltez la profesión.
LA NOCHE DE LA CIUDAD OLAS NUBE
Silencio sobre el silencio. Escucha la espuma Sí, es solo una nube
Volumen construido el eco de la ola pero deja al cielo
de sombras. que fue. en segundo plano.
