close
¡Fuera mázcares!

¡Fuera mázcares!

2011-01-21China y USA1241Visitas

bandera-americana-y-aguilaEl trunfal recibimientu que fizo’l gobiernu norteamericanu al presidente Chinu, dexa bien a les clares, por si nun lo tuviere yá, la catadura d’esi país que s’arroga pa sigo la espedición de carnets de democracia universal. Comides y cenes de gala, salves d’honor, visites a los llugares que son (dicen) el trubiecu de la democracia… Too ello a un de los paises más antidemocráticos qu’esisten. Onde la pena de muerte, nun ye qu’esista, sinón que s’executa davezu y onde los opositores tán toos na cárcel. Onde los responsables de la matanza de Tiananmen siguen ensin nenguna responsabilidá, y onde l’últimu premiu Nóbel de la paz, Liu Xiaobo, tien que sentir la entrega del so premiu nel so solitariu enzarru. Igual-y prestaron una radio.

Contrasta’l tratu que los Estaos Xuníos-yos dan a los chinos, col que tienen, por exemplu, colos cubanos. Cuba ye la culpable de tolos males del mundu y, poro, hai que l’aisllar, hai que la castigar y hai que-y negar tolo que, a otres munches dictadures del mundu se-yos consiente. Ente elles les de los paises árabes «amiguinos» de los USA.china-y-usa

Nun quiero dicir que Cuba seya un decháu de democracia. Seguro que nun lo ye. Pero ye d’una inxustica sangrante’l diferente tratu que se da a unos o otros, según los propios intereses de los americanos. Porque, en definitiva, esi ye’l baremu pa medir la democracia y los drechos humanos. Los que nos interesen, son amiguinos. Los que nun nos importen, porque son probes o dan la lata, son malos, antidemócrates y nun respeten los DD.HH. Una vuelta más, el gobiernu USA pon penriba de too los sos intereses. Paezme mui bien, pero que llueu nun vengan con sermones de moralidá y bones costumes. Yá ta bien de querer engañanos: ¡Fuera mázcares!