Tengo delantre de min un almanaque de colores que tien la semeya d’un cuadru. El cuadru ye de don José Uría y representa a la fía del pintor, Maruja Uría Ríu. Depués pon: Xunetu 2011. En colorao, los númberos. Y debaxo «Muséu de Belles Artes d’Asturies». L’almanaque, n’asturianu como tolos años, debémos-ylu a don Emilio Marcos Vallaure, Direutor del Muséu. Nun fai falta citar el so apretáu «currículum» pa saber que don Emilio ye un gran asturianu y asturianista. Nun sé les razones que tendría p’aceptar un «panchu» tan grande como la Conseyería de Cultura del gobiernu de Cascos, pero si lo fizo toi seguru de que nun son nin poles perres, nin pol prestixu, nin pol «figurar» sino, cenciellamiente, porque camienta que pue facer un bon llabor. Yo prefiero que té él ehí que munchos otros, pero con eso y con too, llamento nun poder ufierta-y un bon futuru. Ye mui difícil ser un bon «vasallu» (y ésti lo ye), sinon tien un bon señor a quien prestar «vasallaxe». Vamos da-yos, a dambos, el marxe de cortesía de tolos cargos nuevos. A los cien díes, podremos facer una primer valoración. En cualquier casu: ¡Muncha suerte Emilio! Y espero que nun te metieres nuna llamarga.
