Fue na llocalidá francesa de Tolón onde esi pequeñu/gran home, supongo que poniéndose de punteres y dando voces, como suel pasar nestos casos (nun vi les imáxenes, pero ye una metáfora, claro) que ye Sarkozy díxonos (yo tamién me meto) que’l problema que tien Europa diben a solucionalu él (el burru delantre) y la Merkel (¡h.oder col sexu débil…!) Y que se trata, p’aforrar discursos, de la Refundación d’Europa. Equí tendría de poner eso que siempre me prestó muncho que ye (sic), y que quier dicir que lo que se pon nun ye opinión del qu’escribe, sinón que ye espresión lliteral del que lo dixo (o escribió). O seya, repito: la Refundación d’Europa (les mayúscules son míes, porque de pallabra nun s’estremen)
Bueno, como fai un par d’añinos díxonos que lo qu’había que Refundar (la mayúscula, etc.) yera na menos que’l Capitalismu, agora ya nun nos asusta tanto. Puestos a Refundar ye más fácil facelo con Europa, qu’a fin de cuentes ta siempre «refundándose» y nun acaba de quedar «fundada», que col Capitalismu, que ya dixeron esos dos centrocampistes atacantes que fueron Marx y Engels, que yera una pantasma que percorría’l mundu (o eso yera’l Comunismu, bueno, da igual). El casu ye «refundar» daqué.
Lo curioso del asuntu ye que son, precisamente, el país del pequeñu/gran home, y el de la Merkel, los que tuvieron dándose de cibiellazos a lo llargo de tola historia, provocando, cola collaboración de dalgunos otros artistes invitaos, na menos qu’un par de guerres mundiales. Asina que, agora, y como los tiempos camuden que ye una barbaridá, en vez de dase cibiellazos, lo que pretenden ye xuntase pa dánoslos a nosotros que, la verdá, nun ye que nun los merezamos, pero que tamos ya mui mayores p’aguantar lleiciones de los que nun tienen nenguna autoridá moral pa dánosles. Anque, eso sí, tienen autoridá económica, y a lo meyor con eso abasta.
Al final va a tratase de que la famosa Xunión Europea va a tener de too, menos xunión. Trátase de dividila en tres partes: Los pexes gordos que tán nel euru. La refugaya que tamién ta nel euru. Y los que tán fuera del euru. Agora que caún aldovine ónde van a asitianos a nosotros. Ye como aquello tan vieyo del colonialismu: Unos van ser les «metrópolis», y otros les provincies colonizaes. Di tú qu’igual too esto ye una idea del pequeñu/gran home cara a les eleiciones del so propiu país, que les tien nel aire. Y ya sabes cómo son los franceses con eso de la «grandeur», siempre-yos impactó muncho. O seya que, a lo meyor, ye sólo verborrea y depués vien la Merkel, que nun se casa con naide (ente otres coses porque ya ta casada) y diz otra cosa. Y los demás, a la orde. Asina que, como dicía un familiar míu cuando taba viendo una película y nun quería marchar pa la cama: «Espera, vamos ver en qué apara». De momentu, lo dicho: ¡Tolón, Tolón!
