close
¿De qué se ríen?

¿De qué se ríen?

2012-03-26Eleiciones Asturies 20121305Visitas

eleiciones-5La imaxe de la clas política asturiana, el día depués de les últimes votaciones, riéndose y abrazándose nes semeyes del periódicu, diome una especie de «voltura» de la que entá nun me recuperé. Porque ¿de qué coño se ríen unos políticos incapaces de llegar a pautos, nun yá colos rivales ideolóxicos, sinón colos de la so mesma «cuerda», pa poder facer un País mínimamente gobernable? La convocatoria d’estes eleiciones fue un fracasu de tola clas política asturiana que nun merecía más que’l resultáu que tuvo: cuasi la metada de los asturianos nun fue a votar. La ridícula participación nes urnes, un 55 %, amuesa l’hastíu y la desafeición del pueblu asturianu haza los políticos que pretenden representala.

¿Y agora qué? ¿Vamos tener que tornar a les urnes indefinidamente, hasta qu’una formación política algame laeleiciones-1 mayoría absoluta, nuna especie de «día de la marmota» electoral? ¿O va a ser posible que los partíos se sienten a falar (non a insultar o dicir tópicos) pa qu’Asturies salga del stand-by y principie a funcionar? Cuido que l’indiz d’abstención-yos dea una pista a estos politiquinos de caleya p’atalantar que si siguen pel mesmu camín, van finar votándose unos a otros, porque’l pueblu asturianu ta yá hasta la gorra d’ineptos que nos salen mui caros.

eleiciones-4Dos pallabres sobre otros grupos non gobernantes: el partíu de la, cada vuelta más «facha», Rosa Díez, algama un escañu nel parllamentu asturianu. Un partíu que pretende (ella lo diz) camudar l’estáu de les autonomíes y (esto dígolo yo) volver a les provincies.  Ya sabemos: las Vascongadas y la provincia de Oviedo. Lo curioso ye que pa eso deben querer dinamitalu (al estáu de les autonomíes) dende dientro, porque si non nun s’entiende’l so afán por figurar nun parllamentu d’eses autonomíes que refuguen. Pa ello cuntaron con un gran despliegue mediáticu. Nunca nun vi a un grupu políticu, ensin presencia parllamentaria, gociar de más espacios, públicos y privaos, qu’estos de UPyD. Vilos na tele, na prensa con semeyes y entrevistes, sentilos pela radio (na SER más de media hora), talo que si fueren un partíu yá asentáu na nuestra comunidá. Nun sé si esto tien dalguna llectura tapecía, pero paezlo.

Y palo cabero, ta claro que los nacionalistes asturianos enquivocáronse al presentase a estes eleiciones. El xuegu nun diba con ellos y yera evidente’l grau de descontentu y, poro, d’abstención de los asturianos (nacionalistes o non) con una clas política incapaz de resolver los nuesos problemes. Yera’l momentu de denuncialo y alendar a esa abstención que taba cantao que diba a haber. Yá ye hora de dexar de dir a remolque de les circunstancies y d’aniciar un mensaxe y una estratexa propios, que nun tean arreyaos a los calendarios políticos o a los discursos de los demás. Organizase, asentase, tener un discursu propiu, trabayar nos conceyos, y sobre too, intentar facese «visibles» a la sociedá sedría la misión pal futuru. Hai que salir de les «catacumbes». Anque yá sé que ye mui fácil teorizar y mui difícil algamar resultaos. Pero hai que se poner a ello. Ensin plazos, pero ensin pausa.