close
1º de Mayu: ¿una rutina?

1º de Mayu: ¿una rutina?

2015-05-011º de Mayu613Visitas

1º de MayuSalimos nuna especie de procesión llaica, coles pancartes, la música, los pequeños cartelos, los petardos… Percorremos les cais de Xixón y, en llegando al Náuticu, sentimos los discursos de los convocantes. Los eslóganes. Los cánticos al empar. Y llueu colamos selemente pa casa. Recuerdo cuando’l salir de «mani» el día Primeru de Mayu yera un actu importante, de protesta, d’afirmación…. y cuasi de peligru. Nun quiero dicir qu’eche de menos la época franquista, o la de la Transición, onde había dalgo de sentimientu de verdadera llucha de clases: Esplotadores y esplotaos. Orden Públicu y subversión. Dictadura y llibertá… Unes dicotomíes que se plasmaben na sociedá con dureza y qu’esi día, precisamente esi día, salíes a la cai pa denunciar.

Agora sigui habiendo dicotomíes, pero paez que too ta un poco más atemperao. Que los cinco millones de paraos, les corrupteles, les caxes «b», les lleis mordaza, los desahuciaos, los que viven na cai y estorben, los inmigrantes que muerren nes nuestres costes o nes de los vecinos… que too ello nun ye a provocar esa sensación de roxura, d’indignación que debiéremos sentir ante eses coses. Y dame la impresión -igual ye a min namás- qu’esti día tan importante na Historia en xeneral y na nuestra pequeña Historia en particular, camudóse nuna rutina. En dalgo que «toca» facer y facemos, como otru día toca dir a la oficina y vamos. Como’l cine de los sábados. ¿Soi yo que m’adoceno, qu’afloxo, que m’avezo a ver les coses mal y siento que nunca nun van meyorar, que siempre, d’un mou o otru van siguir tando mal? Nun sé. Pero prestaríame, per un momentu, volver a sentir esa «santa indignación» de cuando yera más mozu, y les coses facíente dañu, y suañabes con poder meyorales y al tiempu que lo facíes tu tamién meyorabes. Bueno, igual ye que’l día ta raru, o que la primavera asoma les oreyes pela esquina, vete tu a saber. Pero eso sí, esa primavera con una esquina rota de la que nos falaba Benedetti.