Mándame, el mio amigu Yano, unes semeyes antigües qu’escaneó, acompañaes d’un testu de la época, escritu nuna maquina d’escribir d’aquelles del tiempu los romanos. Dambes coses correspuenden a una escursión que ficimos un piñu d’amigos a Picos d’Europa, allá pol añu del Señor de 1963. Tenía’l neñu 19 añinos. El mio recuerdu d’aquello, pese al pasu de tantu tiempu ye mui vivu, lo cual quier dicir que m’impresionó muncho too: el paisaxe y el paisanaxe. En tren a Les Arriondes; n’autobús a Cangues d’Onís y llueu «a pata» hasta los Llagos, comiendo los bocatas al pie de Covadonga. Depués, p’arriba.
Nos Llagos cellebrábase la Fiesta’l Pastor, y aquella nueche acampamos perellí, na cabaña d’un pastor, pues el refuxu taba enllenu. Dormir, la verdá ye que nun dormimos muncho. Porque a los llitros de sidra y otres mecies, xuntáronse un par de pastores un poco «amoñaos» que s’abellugaron con nós. Ún pasó tola nueche diciendo n’alto: «Pepe, soi yo». Y l’otru empeñáu en pasanos un bota vinu cola cantinela de: «Bebéi un poco, ho». En fin, yá una vez alborecío, camín de la Vega d’Ario. Canal de Trea. Caín. Corona. El Cares. Poncebos… Un guapu
percorríu de tres díes que, como digo, dexó fonda güelga en toos nosotros. Y ehí cuelgo un par de semeyes de la famosa «espedición».
Na semeya d’arriba a la izquierda tamos (de manzorga a mandrecha): Esti que firma; Victoriano Sierra (Yano), economista y ecoloxista; el mio hermanu Antonio, entrenador nacional y otres coses; y el famosísimu Bonifacio Sadia, cainejo, Guarda oficial de aquella parte del Parque de la Montaña de Cuadonga y más conocíu por «El diablu de les Peñes». Abaxo ta Manolo Valiño, que fue estremu rápidu y habil del Sporting.
Na semeya de la mandrecha tamos (iz. a dcha.) El guarda del refuxu
d’Ario, Yano, el gallu la quintana (que soi yo), Valiño, el diablu de les Peñes y Alfredo Toraño, bioquímicu, ya investigador del Centro Superior d’Investigaciones Científiques, anque d’aquella yera namás un pelamangos universitariu, como toos nosotros (menos el «cainejo»). Conste too ello pa la Historia.
