Muerre un de los grandes de la pintura asturiana contemporánea. Anque palentinu de nacencia, los años que vivió en Xixón y la implicación que siempres tuvo cola nuestra tierra ficéronlu un asturianu más y asina hai que lu reivindicar. La pintura de Mieres nun yera de gustar a tol mundu, anque munchos, una vuelta que fue famosu, taben encantaos colos sos cuadros. Almiro los sos xuegos xeométricos y el cromatismu de les sos series, pero nun puedo, nin quiero, dicir que yera un amante de la so pintura. Nun importa pa reconcer el so altor artísticu y la so categoría como persona. Si me prestaben, y me presten muncho, les acuareles del so fíu Juan -tengo dalgunes colgaes en casa- col que vamos a «dar la parola» dacuando o a merca-y dalgún cuadro pa regalar, ellí na so tienda «Pincel». Un día pidióme una reseñina sobre la so obra pa los catálogos d’esi añu, y fíce-y una cosa n’asturianu que nos prestó muncho a los dos. O eso dixo él, vete tu a saber. Pero, en fin, falaba de so padre Alejandro al que la muerte de la so muyer, cola que taba mui xuníu, lu dexó un poco albentestate. Xunto colos 90 años, que tamién tienen cantu. Más nada. Un abrazu mui fuerte pa tola so familia, fíos, nietos y bisnietos, n’especial a Juan col que tengo más tratu. Y que la tierra-y sea leve a esti gran artista y comprometíu lluchador.
Semeya: Paloma Ucha
Alejandro Mieres
