close
Arguyosos y amás… llegales

Arguyosos y amás… llegales

El prósimu Día del Arguyu Gay va a tener amestada otra cellebración: la ratificación per parte del Tribunal Constitucional de la Llei de Matrimoniu Homosexual. D’esti mou, una parte importante de los nuestros conciudadanos va a ver reconocíu, yá dafechu, el so drechu a casase con persones del so mesmu sexu, colos mesmos efeutos que tienen los matrimonios heteros.

Ye esti, pues, un día grande pero nun sólo pa los que quieran poder exercitar esi drechu, sinón pa tola sociedá que, d’esa manera, ye un poco más xusta. Porque  si de dalgo pecaron les distintes sociedaes a lo llargo de la Historia, fue d’una mayúscula inxusticia escontra eses persones que, polos motivos que fueren, tienen unes tendencies distintes a les que se consideraben «normales». Una Historia que vio insultos, persecuciones, execuciones y nun sé cuantes coses más, escontra unos seres humanos cuyu delitu yera sentise atrayíos por persones del so mesmu sexu. 

Nidiamente, les Ilesies, y con gran enfotu la Ilesia Católica, condenaron con saña «esi pecáu horrendu», como lu llamaben, empuxando a la marxinalidá, cuando non a la foguera, a munchos d’esos seres humanos, homes y muyeres. Y yá más modernamente, militando en primera llinia pa que nun se-yos reconocieren los sos drechos civiles. Y nun sólo la Ilesia, sinón tamién militantes de partíos de la drecha, y como preba ta esi recursu que güei acaba de fallase.

Hai entovía munchos llugares nel mundu onde los homesexuales siguen siendo perseguíos y maltrataos. Y quiciás, cuando tanto se fala d’esi famosu y horrorosu «Holocaustu» cometíu polos nazis, hai que recordar que nun fue sólo escontra los xudíos, sinón tamién escontra otres minoríes sociales o étniques, ente elles los homosexuales.

Poro, ye’l momentu d’allegranos de qu’equí, n’España, el más altu tribunal que tenemos dea’l vistu bonu a una llei de matrimoniu homosexual. Y a lo meyor ye igualmente’l momentu de reconocer que nel gobiernu Zapatero, sobre too nel so primer mandatu, tamién se ficieron coses bones, ente elles esta llei, o la de la violencia de xéneru, o la de la dependencia. Yo polo menos, que munches veces soi críticu col poder, porque col poder hai que selo siempre, asina-y lo reconozo.

Agora sólo falta que a otros coleutivos que tamién tán viendo los sos drechos conculcaos, del mesmu mou se-yos reconozan. Por exemplu, a los que tenemos una llingua distinta del castellán y que ta n’una situación llegal de manifiesta inferioridá.  Porque la Oficialidá del Asturianu tamién ye un drechu, y n’esto de los drechos nun los hai nin meyores, nin peores: toos son importantes. Espero que dalgún día tamién nosotros podamos cellebralo.