El vergonzosu proceder del un día «honorable» Artur Mas, nel xuiciu por desobediencia que se-y sigui nel Tribunal superior de Xusticia de Cataluña, ye pa ponese coloráu. Nun sólo los catalanes independentistes, nun solo los catalanes en xeneral (puesto que los representaba a toos), sinón los que de lloñe, asistimos a esti duelu ente dos autoridaes del Estáu. Y ye que, al victimismu al que nos tienen avezaos los dirixentes catalanes respeuto al gobiernu español (tolo malo que pasa, inclusive les derrotes del Barsa, son culpa del gobiernu) l’argumentu de «yo nun sé, nun sabía, yo pasaba perequí» ye d’una probeza moral y etica apavoriante. Y eso que nun se trata de dir a la cárcel, sinón de quedar inhabilitáu pa cargos públicos durante unos años. Yo creyía que podía vivise ensin eso. Paez ser que non, dalgunos piensen que son imprescindibles.
Pero ye que, cuando ún anicia un procesu independentista daveres y da pasos nesi camín, hai qu’asumir les responsabilidaes qu’ello lleva consigo. Nun sólo eso. Hai que dar un exemplu de valentía física y moral porque yes un espeyu nel que los tos seguidores se miren. Los dirixentes catalanes «nun sabien» que, convocar un referendum que’l Tribunal Connstitucional prohibía, yera desobedecer. Nun sé qué-yos enseñaríen de pequeños en casa, pero a min suéname a que son unos desobedientes. Poro, en llugar de dar un pasu alantre y dicir: «Oiga sí, convoquélu yo porque nun reconozo les sos lleis y quiero separtame de ustedes lo más ceo posible, y si por ello tengo de dir a la cárcel, pues equí toi». En llugar d’eso, digo, echen la culpa a «un que pasaba perellí»: fueron «los voluntarios». Como cuando se nos estropea la Tele y dicimos : «Ye d’allá».
Nun quiero entrar equí a opinar sobre si debería esistir la posibilidá de facer un referendum, pa que los pueblos del Estáu Español decidan si quieren siguir siendo parte del mésmu o non. Respeutu a Cataluña ya di la mio opinión: nun quiero que se marchen porque ello perxudicaría al mio País, Asturies, y eso pa min ye lo primero. Pero paeceríame bien que la Constitución recoyera esi derechu. Con unes llendes, claro. Tendría que tener una mayoría mui cualificada pa facer una cosa o otra. Nun val eso del 50% de los votos más un. Si non, al añu siguiente los que perdieron podíen pidir otru referendum pa volver a entrar o salir, según fuere la cosa. Eso ye ingobernable. Pero bueno, dixi qu’eso yera otru tema anque toi metiéndome n’él. Lo que quería reflexar hoi equí ye la cobardía d’unos dirixentes políticos que, a la escontra d’otros que conocemos pola Historia, nun dieron un pasu al frente faciéndose responsables de la defensa de les sos idees. Indudablemente, Artur Mas nun ye Gandhi, nin tampoco Michael Collins, sinón un burguesín catalán que quier siguir medrando. Pues pa eso nun fai falta tantu xaréu.
