Ye un vieyu chiste de Gila de la época na que nun se llevaba lo de «políticamente correuto». Nel dibuxu vese a un barcu pirata y el vixía, xubíu a la cofa con unes gafes de ciegu, gritando: «¡Barco al oído!». Esa ye la impresión que me da l’ayuntamientu de Xixón, nun barcu ensin rumbu dirixíu por un invidente.
Lo mío cola alcaldesa yá vien de mui atrás, na menos que de los tiempos nos que fue conseyera d’Educación y Cultura del Principáu. Cero n’Educación y Cero en Cultura. Con dalgunes anéudotes personales que nun ye’l casu (nin el sitiu) de recordar. Yá por nun falar del despreciu continúu a l’Academia de la Llingua de toos conocíu. Avisé de la so ineptitú (ye una «boutade», claro) cuando la presentaron a les «primaries» del PSOE. Mui necesitaos teníen que tar. Y fui siguiendo’l so camín de despropositos y chulería a lo llargo lo que lleva de mandatu. Tuvo que «dar la vuelta y volvese» tantes vegaes que yá nin m’alcuerdo. Pero, coime, lo curioso ye que sigui confiando nun vixía ciegu, al que-y dieron una gorra y un xiblatu y nun para de facer estropicios. Asina, una escura conceyalía que nunca nun tuvo importancia nel Ayuntamientu -¿movilidá?- convirtióla na estrella de les conceyalíes, unviando dende un mapa nun despachu, unes andanaes de babor y estribor que curiosamente tan fundiendo al so barcu. Y lo que ye peor: al nuestru.
Ya s’espardieron toles patagüeyaes de tráficu que lleva feches esti paisanu (por cierto, ¿qué cualificación téunica tien dalguién que vivió namás pala política?) y meyor esplicaes que pudiere facelo yo. Pero quedába-y entovía una mui simpática: metese n’agostu a facer obres nel Muru de San Llorienzu. Si’l CIS ficiere una encuesta a tolos xixoneses entrugando cuál ye l’únicu mes nel que nun se deben facer obres en Xixón, a coru diríemos que n’agostu. Asina, el vixía ciegu y el capitán del barcu deciden faceles xustamente nesi mes. ¡Como tien de ser qu’equí mando yo!
En fin, que too esto tán programándolo pa tres meses escasos de branu (agora menos), que ye lo que dura la época estival, porque yá verán que concurrida va tar toa esa zona peatonal de les cais Covadonga-Ruiz Gómez-Caridá y los carriles cortaos del Muro cuando principien esos díes ivernales, de muga, borrina, etc. etc. que ye lo que tenemos. Aprovecharánlos tres paisaninos y cuatro perros. Y sé de lo que falo porque vivo al llau de la playa y pol llaaaargu iviernu de seis meses, toi yo solu pasiando per San Llorienzu. Bueno, que sigan dando argumentos a los barrios de Xixón (que son toos) que tán en contra de la so xestión. A ver quién vuelve a votar a esta señora que nin ye de Xixón, nin se la espera.
(Semeya: El Comercio)
