Volvieron, como les escures andarines becquerianes, los premios Príncipe d’Asturies a colgar los sos ñeros nel Teatru Campoamor. Y ficiéronlo con un actu tan repetitivu que yá nun aporta nenguna novedá. Nin siquiera les cares de los premiaos paecíen nueves, pues a los futbolistes de la seleición, entrenadores y cuerpu téunicu (que se diz agora) tenémoslos más vistos que’l TBO. Paez ser que los más «mediáticos» de los premiaos yeren Pepe Reina y Vicente Del Bosque. Asina tán les coses.
Y ye llamentable esa falta d’imaxinación, porque dalgo que podía aprovechase p’ «asturianizar» un migayu l’actu (nin siquiera les bandes de gaites tienen nenguna tradición asturiana), pa facer que l’heriedu de la Corona s’enraigonare un poco más nel títulu que lleva, p’amosar a los forasteros qu’equí hai un pueblu y una comunidá diferenciada, cola so llingua y tradiciones, piérdese, cada vuelta más, nuna recatafila de tópicos y d’escaparate de modistos y diseñadores.
Sigue ensin haber, nel discursu del Principín, una sola referencia a la realidá asturiana. Sigue menospreciando a la nuestra llingua, nun ye siquiera a dicir una fras d’un escritor, d’un poeta, un refrán, un dichu popular, dalgo qu’amuese que sabe ónde ta falando. Y a cambiu, suelta una recatafila de grandes frases, dafechamente vacíes de conteníu, que los periódicos apresúrense a bautizar como intelixentísimes: «El Príncipe pide fortalecer las instituciones para solucionar la crisis». ¿Pero qué broma ye ésa? Qué nos desplique esa solución que nengún país utilizó entovía pa salir de la crisis. Otru titular: «Don Felipe hace una llamada a salir de la crisis» (!) ¿Una llamada a quién? ¿A los políticos? ¿A los empresarios? ¿A los paraos? ¿Al home del tiempu? Paez de risa, pero nun lo ye. En llugar de partir de los raigaños del pueblu al que representa, por títulu, que non por eleición, dedícase a pronunciar grandes frases grandilocuentes, empobinaes a un públicu papanates, ensin dengún espíritu críticu, qu’afalaga cualquier «vaciedá» que venga de la so boca.
Les úniques pallabres sensates salieron, como nun podía ser d’otru mou, de la boca d’Amin Maalouf y de Zygmunt Bauman. «Nesti mundu, la única certeza ye la incertidume», dixo esti últimu. » O, «pasamos de ser ciudadanos a ser consumidores». Pol so llau, l’autor de «Lleón l’africanu» faló de la convivencia na diversidá: «Lo qu’importa nun ye saber si podremos vivir xuntos, pese a les diferencies de color, de llingua o de creencies: lo qu’importa ye saber cómo vivir xuntos, como camudar la nuestra diversidá en porgüeyu y non nuna calamidá».
Per último, constatar la esmolición del Príncipe pola actual situación económica. Los paraos agradecerán-ylo. Pero a lo llargo de la xornada aterrizaron nel aeropuertu d’Asturies 46 aviones privaos. Igual dalgún de los sos ocupantes podía dar exemplu viaxando nel ALSA. Dexo lo de los modelinos d’alta costura pa les revistes del corazón.
