Col trunfu d’ayeri frente a Georgia por 2-0, la seleición española de fútbol marcha camín de Brasil pa xugar el prósimu mundial. Con seis partíos ganaos y dos empataos (en casa escontra Finlandia y Francia) paecería que la cosa yera inmeyorable, pero debe ser qu’un ya «refalfia» un cachu porque la verdá ye que’l xuegu del equipu baxó de nivel bultablemente. Y hai un aspeutu mui nidiu onde esto se nota, que ye cara al gol. D’aquel tandem ente’l nuestru Villa y Torres a lo qu’hai agora nótase diferencia. Pa peor, claro. Y ye que cualquier equipucu del montón como son, por exemplu, Bielorrusia y Georgia con zarrase delantre’l so porteru prodúcennos abondes dificultaes.
En cualquier casu, y sé que voi repitime de lo dicho n’otres ocasiones, la culpa de too ello, al marxe de los años y les lesiones de Villa y Torres, ye la del nuestru queríu Marqués Del Bosque, esi home cenciellu y prudente que cai, una y otra vuelta, nos mesmos erros. Porque esa «mandanga» de xugar con un «falsu nuevu» ta yá comprobao que ye tirar mediu partíu pela borda. Y digo mediu porque, a la fin, siempre tien que lo enmendar nes segundes partes sacando a un delanteru de verdá pa que resuelva lo qu’elli fizo mal. Por eso la prensa, que lu adora, titula al día siguiente: «Del Bosque acertó colos cambios». Claro, si acertó colos cambios ye que l’equipu que punxo nun yera’l más correutu. Total, como digo, perdióse mediu tiempu. Y ye que seguir xugando con cuatro defenses y seis centrocampistes, escontra contrarios vulgares que van meter a los once futbolistes dientro l’aria sólo se-y ocurre a un «tochu». Anque seya Marqués. El cambiu notóse, por exemplu, escontra Georgia onde, con un 9 daveres (Negredo), dos estremos/estremos y un par de llaterales que cuerren la banda y centren (non como Arbeloa que xuega p’atrás), la cosa meyoró bastante, pese a la perda de frescura de Xavi ya Iniesta, y l’ausencia de Xabi Alonso que daba sentíu al centru’l campu. En fin, que nos allegramos muncho del pase al mundial, pero eso nun tien que nos cegar pa correxir esos defeutos d’alliniación que dependen, namás, del selecionador. Nun tien qu’enseñar nada nuevo a unos xugadores bonísimos, lo que tien que facer ye ponelos caún nel so sitiu y adeprender de los erros cometíos. Si ye que sabe.
