El catedráticu de Ciencies de la Educación d’una universidá californiana, Laurence J. Peter, enunció va tiempu’l so famosu «principiu» que ye de xeneral aplicación. Dicía dalgo asina: «Nuna xerarquía, tou empleáu tiende a xubir hasta algamar el so másimu nivel d’incompetencia». El casu del obispu Osoro, recién nomáu sucesor de Rouco Varela, ye’l casu más paradigmáticu del cumplimientu del «principiu»: nun se pue ser más incompetente.
Lo curioso del casu ye que, según pon la prensa, asciéndenlu al nuevu cargu «por su carácter dialogante y contemporizador«: ¡Ehí te va esa! Igual d’otru nun podríemos dicir nada, pero da la casualidá qu’a esti paisanu sofrímoslu en primer persona como arzopispu d’Uviéu. El so pasu per estes tierres nuestres fue un completu fracasu nel que destacaron dos grandes defeutos: la falta de diálogu y la so facilidá pa meter la pata por nun saber contemporizar. Xusto lo contrario de lo qu’agora-y atribuyen. Ayenu, cuando non despreciatible de la realidá asturiana -llingua, cultura, vezos…- enfrentóse colos asturianistes dende’l momentu en qu’aterrizó perequí, con aquel funeral por Fico Fierro nel qu’omitió la defensa qu’ésti ficiere de la nuestra llingua ycultura. Enfrentóse colos militantes de base cristianos, a los que prohibió cellebrar les sos xornaes porque nun-y prestaben los conferenciantes. Fizo’l ridículu colos monxos de Valdediós, que desendolcaben un importante llabor cultural y relixosu, a los que consiguió echar dexando un vacíu qu’entovía güei nun se pudo rellenar, tres fracasar la orde que traxo pa sustituilos, y auquiera que fue la razón atropelló, la virtud escarneció y a la xusticia burlló, como un don Xuan de caleya. Llargó d’equí en cuantes pudo, y yá en Valencia entovía tuvo ocasión d’ofendenos cuando faló de la llingua valenciana. Notóse más, porque nosotros teníemos l’exemplu del gran Gabino Díaz Merchán, enfotáu na cultura y la llingua asturianes y na defensa de los trabayadores y los más necesitaos. Tolo que l’otru nun fizo.
Agora, como premiu pola so actitú y los sos «méritos», nómenlu Arzobispu de Madrid sustituyendo a Rouco, otru que tal bailla. Dicen que’l Papa Francisco ye un gran aficionáu al fútbol, dalguién debió aprovechase d’ello pa cola-y un gol como una casa.
