Con un llenu absolutu nes dos representaciones que ficieron nel Teatru Xovellanos, Juan Echanove y María Galiana interpretaron la comedia romántica «Conversaciones con mamá», de Santiago Carlos Oves y adautación de Jordi Galcerán. Entovía se sienten los aplausos a la vera del cafetón Dindurra, agora n’obres pero ya prestu a abrir. ¿Ye pa tanto?
Pues podíemos dicir que sí, non tanto pola obra en sí, como pol llabor estraordinariu de dambos actores que borden los sos papeles. Y quiciás equí’l términu «estraordinariu» tea de sobra, porque lo que define’l trabayu de los dos intérpretes ye, precisamente, la normalida, lo «ordinario». Echanove nel papel d’un altu executivu d’una empresa, agora en crisis, y qu’acaba de ponelu na cai, colo qu’eso supón: paisano d’edá yá avanzada p’atopar otru trabayu, altu nivel d’endeudamientu (hipoteca carísima, colexos privaos de los fíos, muyer gastiza que nun s’adauta…), en fin, nada nuevo embaxo’l sol. Y Galiana, so madre de 82 años que vive sola, na so propia casa, casa que’l fíu quier vender pa salir del enguedeyu nel que ta metíu.
La obra ye, entós, una llarga conversación ente madre y fíu, nun únicu espaciu teatral (la cocina de la casa familiar), y dos espacios temporales que se lleven un par de meses ente sí. Y nesa conversación sal un poco de too. De tolos temes d’actualidá que los actores van desgranando, al tiempu que surden los recuerdos, les señaldaes, pero tamién los reproches, les coses que se sintíen pero que nunca nun se dixeron. Con elles, pincelaes feministes d’aquelles madres nuestres que callaben cuando’l maríu-yos ponía los cuernos, o tomaba decisiones al marxe d’elles, y qu’agora vense d’otra mena. Y pequeñes crítiques sociales, del mou de vida que llevemos, siempres percima de les posibilidaes, del individualismu feroz, de les rellaciones de pareya… Pero too ello dientro d’un textu cenciellu, ensin grandes pretensiones crítiques, cuasi ensin querer molestar. Quiciás un poco convencional porque la fin de la obra ye entretener más que criticar. Asina, el públicu asistente, na so mayoría femenín y de cierta edá, rieron y aplaudieron ensin que nada-yos molestase de mou importante. Un ciertu mensaxe, pues, pero de los que puen asimilase fácilmente. Na obra hai tamién dalgunes pretendíes sorpreses, que nun cunto por si hai la posibilidá de volver a vela, pero cuasi too ye esperable, previsible, lo cual nun quier dicir que tea mal. Al contrariu, too ta bien trayío argumentalmente.
En resume, una obra entretenida, que se dexa ver con agradu y la sonrisa nos llabios y que, penriba de too, cunta con dos actorazos que faen creyible tolo que-yos echen. Ellos solos son garantía de calidá y esfrute. Norabona a los dos.
