Conocílu pente medies de la so moza, Gela, llueu pareya suya en toos estos años. Gela yera compañera de trabayu en Crady de la que fue la mio muyer Tere y xunto a ella partícipe de les lluches y llaceries d’aquel murniu conflictu que tanto duró. Couto y yo vivímoslo por persona interpuesta, y tuvimos de facer de pañu de llárimes y de sofitu firme pa munchos díes en que la so moral, y la de toles que con elles participaben, enflaquecía depués de los munchos palos recibíos. Palos nun sólo metafísicos, sinón tamién reales. Tovía recuerdo cuando n’antigua Estación del Norte encadenáronse al Talgo ya intervinieron los GEOS pa “lliberales” y facer que la cosa volviere a furrular. Dende l’andén Couto y yo xixilábemos lo que taba pasando y tuvimos d’intervenir pa que la cosa nun fuera a mayores. Yo termine con un zapatu de Tere na mano que di “xentilmente” a un de los guardies pa que-y lu metiere nel furgón.
Anque nun yera la primera de les sos esmoliciones, Manuel Couto yera tamién mui asturianista y defensor de la nuestra llingua. De fechu asistió, xunto con Gela, a la famosa escursión de Conceyu Bable-Xixón al puertu la Bal.lota en xunu de 1975, onde se llevó por primer vez la bandera asturiana nun actu públicu. Bueno, públicu nuestru, claro.
En toos estos años caltuve esa buena amistá cola pareya coincidiendo en munches actividaes, como les del Atenéu Obreru y los sos prestosos viaxes, y siempre nos siguimos nes coses que facía cada un. Buen conversador y polemista, Couto fue una persona defensora de los trabayadores, dende la so militancia sindical y la so actitú vital. Diba yá un tiempu que nun lu vía y sorprendióme enterame del so fallecimiento pola prensa. Dende esti modestu blogue quiero unvia-y un besu y un abrazu mui fuerte a Gela, amiga y collacia, y a la so fía y restu la familia. Ye una perda mui grande nun solo pa toos ellos, sinón pa los que nos consideramos los sos amigos y p’Asturies en xeneral. Que la tierra-y seya leve al amigu Manuel Couto.
Semeya: El Comercio
