Que la xusticia ye un poco chancia nesti llugar llamáu España, ye abondo conocío. Toos tenemos exemplos, en carne propia o ayena, de sentencies arbitraries ya inxustes, cuasi siempre, casualmente, a favor de los poderosos. Pero lo que nun acabo entender ye cómo, pa un mesmu casu, les opiniones ente dos xueces puen ser nun sólo contraries, sinón tamién contradictories.
Va un poco tiempu -como un par de meses- hubo un fallu xudicial al rodiu del desaloxu del Centru Social Okupado «La Madreña», nel sen de dar la razón al coleutivu, asitiáu n’antigua Conseyería de Sanidá, y dexalos siguir prestando tolos servicios que, dende hai un par d’años lleven prestando. Unos servicios sociales, culturales y asistenciales siempre en porgüeyu de los que más lo necesiten. Los que pleiteaben yeren los propietarios del llocal, la empresa SEDES, de mayoría de capital públicu (lo cuál quier dicir tuyu y míu, qu’eso ye lo público), una empresa qu’a lo llargo dos años nun s’enteró de que teníen ellí un llocal y qu’agora anda echando xente a la cai con ERES y coses d’eses.
La sentencia del señor xuez sofitábase, creo, en varies razones, ente elles la utilización del llocal pa fines sociales y
en porgüeyu de la comunidá, el curiáu del sitiu, calteniéndolu llimpiu y curiosu, cosa que nun pasaría si quedare vaciu, y la indefinición de la empresa que nun sabe lo que va a facer con elli, yá que la construición de viviendes paez descartada. Toos contentos. Per una vuelta la xusticia favorez a los probes.
Pero he equí que, esti día, vien otru xuez y diz que, non home non, que d’eso nada. Qu’hai que lo desaloxar nel plazu una selmana y devolvé-ylu al so dueñu (a nosotros, entós), aprovechando pa llamar «delincuentes» a los miembros del coleutivu. Y equí la mio estrañeza. ¿Esos dos xueces estudiaron en sitios distintos o carreres distintes? ¿Cómo delantre unos mesmos fechos puen dicise dos coses tan opuestes? Y sobre too ¿cómo podemos fianos d’una xusticia que nun tien un mesmu criteriu a la hora xulgar? ¿Dependemos, entós, del señor xuez que nos toque en suerte?
La impresión que da ye que se trata más bien d’un tema ideolóxicu. De que determinaos profesionales de la xudicatura son unos fachas, a los que-yos molesten estos coleutivos autoxestionaos, y que lo que tienen ye mieu de qu’esti exemplu xorreza. De que la xente principie a dase cuenta de que les coses feches dende abaxo, onde l’asamblea tenga coses que dicir y nun se tea manipuláu por partíos, sindicatos o otros poderes fácticos puen funcionar perfeutamente, y meyor que del otru mou. Nun tiempu qu’hasta les xuntes de vecinos tán remanaes polos partíos políticos, coleutivos como esti de la Madreña son un exemplu pal futuru de que les coses puen facese d’otra manera. Y eso, quiciás, ye lo que dalgunos nun aguanten. Deben tener mieu a que terminen dándo-yos un «madreñazu».
