Siempres fui mui torpe pa entender les complexidaes de los distintos planes d’estudiu, másime cuando avezamos a tener ún por cada gobiernu. Al puntu de que, dalguna vez que me llamaben pa falar a los rapazos d’un colexu, siempre-yos tenía que pedir la edá, porque lo de los cursos nun lo atalantaba mui bien.
En cualquier casu, nun hai que ser mui llistu pa entender que con esta nueva llei, conocida pola LOMCE (y lo de les sigles tamién «manda madre»), la llingua asturiana queda dafechu fuera d’escueles, colexos ya institutos. O seya, como si nun esistiere. Too esto, amestao a la quita de les subvenciones a les empreses y asociaciones, y el recorte a tolo demás empobina, a un plazu cuasi inmediatu, a la desapaición total de la nuestra llingua propia.
Poro, pue resultar illustrativo facer un manifiestu onde se ponga l’acentu na responsabilidá social del pueblu asturianu
pa cola so llingua pero, visto lo visto, paez que ye un exerciciu un poco superfluu. Ta claro que si l’asturianu fuere una prioridá social, habría muncho tarrén ganao na so defensa. Pero d’ehí a cargar les culpes nuna sociedá, que yo bauticé como «sociedá bonsai» por aquello de los recortes que-y van dando, nun me paez xusto nin acertao. Xusto, porque hai unos responsables políticos con muncha mayor culpa, y que tienen nes sos manes la posibilidá del afitamientu llegal de la llingua y nun lo quieren facer. Y acertao, porque agora se ve (si ye que nun se vio enantes) que de nada valen «voluntarismos» sociales, si con un decretu d’esi tal Wert puen mandanos al asturianu a los espacios siderales. Si l’asturianu fuere oficial, habría tamién dificultaes, pero eso nun lo podríen facer. Hai, por tanto, una escala valores y unes prioridaes. Y, claro, con una competencia llingüística onde una de les llingües lo tien too, y la otra nin siquier tien reconocimientu oficial, pidi-y a la sociedá que se vuelque con ella ye pidir demasiao.
Total, que con esti panorama, engrandáu col pieslle d’editoriales, periódicos dixitales, llibreríes especializaes y un llargu etcétera, nin siquier «la sociedá» va a tener qu’escoyer llingua, porque bien ceo nun va a haber más qu’una. Y ye qu’esta famosa Llei de Wert recuérdame a otra tamién mui famosa nes películes de vaqueros: la llei de Lynch. Cuando se coyía a un supuestu delincuente, nun facía falta xuiciu nin xuráu. Garrábase una cuerda y aforcábaselu. D’ehí lo del «linchamientu». Dame la impresión de que lo que van a aplicanos a nosotros nun va a ser la Llei de Wert, sinón la Llei de Lynch.