¡Cómo nun escribir dalgo al rodiu de la muerte d’Alfredo Landa! Landa, acompañonos, querámoslo o non, nuna gran parte de la nuestra trayeutoria vital. Tamién otros actores españoles, pero él sobre manera. Apresúrome a dicir qu’arreniego del cine que representó a lo llargo de la primer parte de la so biografía. Agora que ta muertu, lleo en dalguna prensa qu’aquelles películes de lo que se dio en llamar «el landismu» yeren fiel espeyu del español mediu. ¡Seríalo del que lo diz! Nin yo nin los mios amigos, que yeremos «xente normal», identificámonos nunca con aquel especimen de boina atorniellada, xesticulante, esbabayando detrás de les muyeres (valíen-y toes, como diz nun de los cortes que nos ufierta la tele) y dafechamente apolíticu. Esi nun yera l’español mediu, yera la visión estrábica que teníen les nuestres autoridaes de lo que queríen que fuéremos, que ye dalgo distinto. Y la risa que provocaba yera esa risa «lumpen» de los que yeren como él, o los que se víen tan superiores que lu emplegaben como’l «bufón de la corte».
Pero d’esi estereotipu fabricáu pola «industria» y la política hai que salvar al actor. Porque, inclusive pa ser «paródicu», hai que saber facelo bien, y Landa facíalo. Y ye que, en primer llugar, hai que comer y si pue ser de lo que meyor sabes facer que, nel casu d’él, yera interpretar, pues perfeuto. Y, claro, n’aquella España que quería espolletar pente medies del turismu y dalguna otra cosa, había que garrar lo qu’había. Y lo qu’había yeren aquelles insufribles comedies, ramplones y repititives, d’unos productores que nun esponíen un res y que taben a años lluz de lo que tien de ser un
dignu entretenimientu, nun yá un productu cultural.
Nel mesmu casu que Landa tuvieron otros grandes actores, tamién espuestos al ridículu, como José Luis López Vazquez o José Sacristán, hasta qu’un día un bon direutor pudo ufierta-yos un papel dignu. Nel casu de Landa fue Bardem, nuna película llamada «El puente» na que paecía que diba a repitir el so papel de siempre, marchando de «puente» nuna moto a Torremolinos a «ligar», pero que a traviés del viaxe principia a tomar conciencia d’otres coses non avezaes. A López Vazquez salvólu Saura, que lu llevó en tres o cuatro películes interesantes principiando por «Pipermint frappé», y la redención de Sacristán vieno per varios direutores como Camus o Berlanga, hasta aportar a esa gran película de Aristarain que se llamaba «Un lugar en el mundo», xunto al enorme Federico Luppi, una de les meyores películes de fala hispana.
Dignos actores españoles, qu’eso que dio en llamase «la industria» arrequexó en papeles indignos, anque agora dalgunos quieren aprovechar la fola pa reivindicalos. Poro, el mio homenaxe póstumu al actor Alfredo Landa, y la mio repunancia ética y estética a los que lu ficieron tragar con toa aquella morralla infumable.
