Cuando entá queda muncho por peñerar -pactos, pactantes y gobiernos resultantes- quiero dar «a bote pronto» unes personales reflexones sobre lo que pasó esti domingu. «Domingu’l gordu», podíemos llamalu, que como tou bon xixonés sabe ye’l domingu d’Antroxu. Y principio, entós, pola estaya municipal del mio pueblu onde ganó una persona que seguramente nun sabía lo que ye’l domingu’l gordu. Porque dame la impresión que doña Ana González, prósima alcaldesa d’esti pueblu del culu moyáu, ye una paracaidista, nel sen políticu del términu. O seya, persona venida d’otru llau que, por motivos políticos, al so partíu interésa-y ponela equí. Nun quiero paecer descortés, tol mundu tien derechu a presentase, y a que la presenten, onde llegalmente pueda. Pero siempre se dixo, y yo compártolo, que nes eleiciones llocales habría que votar más a la persona qu’al partíu. Vi l’otru día na TPA unes entrevistes que se facíen polos pueblos asturianos y tola xente dicía que diba a votar al de casa, al conocíu y al que nos conoz, enantes de qu’a tal o cuál partíu. Yo caltengo lo mesmo pa Xixón que nun ye más qu’un pueblu grande. Porque nun tolos pueblos son iguales y lo que, a lo meyor val pa un sitiu, pa otru nun val.
Xixón ye una ciudá vieya, con personalidá propia, con una historia, unos vezos, un sentíu del humor «playu», inclusive una forma de falar especial qu’hai que conocer pa poder entender. ¿Conozlo y practícalo la señora González? Bien, podría dicise que los votos que sacó la avalen. Discutible. El tirón electoral de Pedro Sánchez fue pergrande y esto nun son más que les répliques del terremotu que s’entamó va un mes y picu. Abúltame que cualquier candidatu nel so llugar sacare lo mesmo o igual más. Esto ayudao pola fonda enquivocación de l’anterior alcaldesa, que renunció a presentase pa dir a cagar la fame al Parllamentu Asturianu. Ellos sabrán. En fin, que lo que conozo de la futura alcaldesa nun ye mui positivo, nin el so pasu pola Conseyería d’Educación y Cultura (mal n’Educación y peor en Cultura), nin les sos declaraciones post-electorales onde pretende desprestixar los 8 años de Carmen Moriyón: «años tristes», los llamó. Seríenlo, pero yo que nunca la voté puedo dicir que fizo más ella polos grandes temes de la ciudá que los sos amigos candidatos anteriores. Aprobó’l Plan Xeneral d’Ordenación, que llevaba años refugáu, y el famosu Plan de Víes qu’abren nueves pespeutives de desarrollu pa la ciudá. Con eso ya nun podríen llamase «años tristes». ¡Ah! y tuvo como conceyal al únicu asturianista y xixonesista qu’hubo hasta agora. Nun ye poco. En fin, pa zarrar deséo-y a la prósima alcaldesa muncha suerte. Tien agora cuatro años pa dir entendiendo dalgo d’esti pueblu, empezando poles calles. Paeciónos vela l’otru día con un GPS pola zona los vinos pa llocalizar dalgún sitiu. Y ye que ¡menos mal que tenemos a la tecnoloxía!
