Anda mui ruxíu un manifiestu sobre la llingua asturiana firmáu polos hermanos d’Andrés (Ramón y Vital), y pol anterior responsable de la Política Llingüística del Principáu, Alfredo Álvarez , que lleva por títulu: «La sociedá ante la llingua: compromisu y futuru». Son tres persones, al mio xuiciu, perfeutamente capacitaes pa plantegase’l tema y que tienen una trayeutoria (llóxicamente unos más qu’otros) de defensa de la nuestra llingua propia. Abúltame tamién que nun ye malu’l momentu escoyíu p’asoleyar esti manifiestu, pues ye verdá qu’esiste un momentu d’ «impass» na llucha y les estratexes a siguir p’algamar l’afitamientu dafechu del Asturianu.
Dicho lo anterior, y lleendo ensin nengún prexuiciu’l manifiestu, como creo qu’hai que lu lleer, quixere facer dellos comentarios siempre dende’l respetu que me merecen les opiniones ayenes. Lo primero que se m’ocurre ye que’l manifiestu ta mal estructuráu. Y paezme que los autores tamién lo saben. Y digo esto porque pa mi, lo más importante que se diz nel manifiestu y que comparto dafechu vien, precisamente, nel últimu párrafu. Ye ellí onde los autores, dempués de toles cavilaciones, clasificaciones, opciones o disyuntives, afirmen qu’hai un aspeutu «…que ta penriba de les sensibilidaes y concepciones que caún tenga alredor de la llingua y el so futuru (motivu, como sabemos del mentáu manifiestu) trátase de los derechos llingüisticos de les persones, que son una parte de los derechos cívicos d’una sociedá democrática. Y más alantre, dientro’l mesmu párrafu: «cuando un ciudadanu escueye llibremente usar l’asturianu el deber de l’Alministración ye nun pone-y problemes de nengún tipu…» Lo contrario ye «…impropio d’un país que cree nes lleis y les fai cumplir…» Tol restu’l párrafu nun tien desperdiciu, finando cola última fras del manifiestu que diz: «Sólo fai falta un compromisu cola democracia y los sos derechos».
Yo creo qu’esto, que ye opinión de los firmantes, nun debería dir al final de tolos discutinios y razonamientos, sinón al
empiezu, porque ye’l puntu de partida de toles reivindicaciones llingüistiques d’esti país nuestru. Si llueu la sociedá sofita o nun sofita. Si ta dispuesta, o non, a llegar más o menos lloñe. Si dalgunos quieren a la llingua como Patrimoniu, como Mediu de Comunicación o como Símbolu, siguiendo’l razonamientu de los autores, ye importante, pero menos. Lo verdaderamente esencial ye que se trata d’un derechu democráticu y, como tal, hai que lu desixir. Llueu na sociedá habra de too: habrá los que quieran asitiar la llingua en caún d’eses tres estayes y, seguro, n’otres más que se podríen amestar. Pero, como tengo dicho yá en munchos foros, esto nun ye un problema de númberu, ye un problema de derechos, talo que si fuere una sola persona l’afeutada, y paez que neso, de magar el párrafu del manifiestu enantes citáu, tamos d’alcuerdu «el tripartitu» y yo. Y cuando enantes dixi que’l manifiestu taba mal estructuráu y que los autores tamién lo sabíen, nun lo dicía de mou retóricu. Ellos mesmos, al aniciu d’esi párrafu final dicen lliteralmente: «Finalmente hai un aspeutu previu de gran importancia…» Y sorrayo lo de previu. Si se trata d’un aspeutu previu, debería dir delantre porque, d’esi mou, aforraríamonos munches de les disquisiciones posteriores que planteguen los autores. Hai, al respeutu, un chiste mui vieyu nel qu’un cura entrúga-y al sacristán que por qué nun tocó la campana:
-Por tres razones -diz el sacristán. La primera porque la campana nun tien mayuelu…
-¡Abasta! -retrúca-y el cura- Con esa yá sobra.
Y ye que, claro, si la campana nun tien mayuelu, yá nun fain falta más razones. Nel manifiestu tripartitu, si nos ponen nel primer llugar la defensa de la llingua como un derechu democráticu d’obligáu cumplimientu, sobren les demás razones. La campana nun tien mayuelu. ¿Quier eso dicir que SÓLO cola Oficialidá taría la llingua salva? Claro que non. Entovía quedaría un fondu llabor social, y ehí ye onde inciden los autores del escritu, p’ alendar a la xente a emplegar la llingua, a espresase n’ella. Pero a mí nun me cabe dulda de que, en siendo oficial, les coses sedríen muncho más fáciles qu’agora, y el sofitu de la sociedá tamién sedría mayor anque namás fuere pol prestixu algamáu. En cualquier casu, creo que ye d’agradecer a los autores del manifiestu, el so afondamientu na situación social de la llingua y el tratar de facer una semeya del so estáu actual. Sobre manera si eso da pie a facer un alderique civilizáu y ver, ente tolos que queremos a la nuestra llingua, el camín futuru que tenemos de siguir. Habrá que continuar falando y trabayando.
