Pasó, un añu más, el Día de les Lletres Asturianes. Un día que debiere ser el más especial pa tolos qu’amamos a la nuestra llingua y, caún na so midida, lluchamos por ella. Esi día en que, los esfuercios de tol añu de persones y asociaciones, deberín desembocar nunos actos de celebración y, al empar, reivindicativos. Festexar al idioma que nos entregaron y que tenemos el deber de tresmitir y, al tiempu, denunciar la murnia situación en que s’alcuentra. Pero, un añu más, esti día déxame nel coral un tastu de tristura y desmotivación.
Y ye que nun acabo atalantar cómo, xente que trabaya individual o coleutivamente por esa llingua, nun ye capaz de movilizase na fecha más importante del añu. La que ye’l nuestru escaparate social p’amosar que sí, que ye verdá, que vamos en serio y que nun somos cuatro pelamangos. Na que podemos demostrar al restu de la sociedá asturiana que somos dalgo más qu’unos llorones en cata de subvenciones, que somos capaces de salir a la cai y enllenar la cai Uría y les cais de la rodiada, y atarraquitar un teatru que’l restu l’añu ta empobináu a manifestaciones burgueses. Porque defendemos dalgo nuestro, y dalgo nuestro que ta a piques d’esapaecer.
Pero non, a lo que se ve, nun somos capaces de facelo. Na «mani» que tolos años entama la Xunta pola Defensa de la Llingua, nun somos a pasar d’esi grupu, que nun ye despreciatible, de los cuatro o cinco mil asistentes, eso sí, enllenos de coloríu y tipismu. Y d’esos asistentes, nin siquier la metada entiende lo importante que ye atiborrar el Campoamor y arropar a l’Academia nes sos denuncies añales sobre l’estáu llaceriosu de la nuestra llingua.
Yo entiendo que haya xente a la que-y caiga mal l’Academia, o que nun tea d’alcuerdu colo que fizo, colo que fai o colo
que fadrá. Daveres que lo entiendo. Ye imposible qu’una institución humana, y más nel contestu en que l’Academia tuvo y tien que trabayar, nun metiere en delles ocasiones la pata. De xuro que la metió y más d’una vez. Tamién ye verdá que a la másima institución llingüística asturiana criticósela, unes veces por defeutu y otres por escesu. Ye dicir, hai xente que piensa que se quedó curtia nes sos actuaciones o denuncies, y otros, del memu mou, atalanten que se «pasó de frenada» y que nun tendría qu’escedese nos sos cometíos. Y ente esos dos estremos, les postures intermedies que queramos. Pero pa criticar eso tenemos el restu del añu. Y nun son poques les crítiques que se faen dende determinaos medios, y de declaraciones de persones en prensa, radiu o televisión. Por poner un exemplu que yá nun importa, l’esapaecíu selmanariu «Les Noticies» tuvo una riestra d’editoriales mui duros cola Academia, y eso que militaben na mesma causa. Taben nel so drechu de facelo, como tamién los demás tábemos nel drechu de criticalos a ellos por, por exemplu, da-yos «cancha» a notables enemigos de la llingua.
Pero toes eses crítiques que, si son razonables, puen y deben facese, entiendo yo qu’hai que les aparcar cuando lo que ta en xuegu ye tan importante como apaecer fuertes y xuníos delantre los políticos, los periodistes y el restu la sociedá non asturianista. Esi día hai que guardar les engarradielles y, anque la Xunta «Pola» o determinaos grupos qu’asisten nun te caigan bien, manifestate ellí, peles cais de la capital. Y ánque l’Academia nun te caiga bien, depués hai que tar nel Campoamor, abellugando a la Presidenta de l’Academia que, como tolos años, va a pidir delantre les autoridaes qu’ellí tán y delantre de los medios de comunicación la Oficialidá. Ye’l marcu más importante onde se pue pidir: primero na cai, y llueu nel Teatru principal de la capital d’Asturies, onde se dan los Premios Príncipe d’Asturies.
Hubo, pues, munches ausencies. Demasiaes. Les primeres les oficiales, les de los políticos incapaces de cumplir con una llingua milenaria que nun saben qué facer con ella pa que nun-yos moleste. ¿Nun deberíen tar, el día más importante pa la Llingua Asturiana, parte cimera de la nuestra Cultura, el Presidente del Principáu y el Presidente del Gobiernu? ¿Nun debería tar la Conseyera de Cultura, que dixo la faltosada de qu’esi día tenía una «gala del Judo». ¡Qué nun Joda! Eso ye un insultu pa la nuestra cultura que, en cualisquier otru llugar, pagaríase col despidu. Hubo, eso sí, políticos de tolos grupos parllamentarios (menos, paezme, que d’UPyD), otros políticos por llibre y muncha xente de la Universidá, incluyendo decanos y caderalgos. Pero les ausencies que a mi me dolieron fueron «les nuestres», les d’escritores, maestros… esos que piden individualmente la Oficialidá, pero que nun tuvieron nel foru más afayaízu pa facelo y nel momentu más importante. En fin, igual ye que toi yo enquivocáu y les coses tienen que ser asina, con enfados, con reproches, con ausencies… Agora que si son asina, llueu nun lloramiquemos cuando la cosa nun tenga yá igua. Camín vamos d’ello.
