A la fin asocedió lo que la Casa Real y tolos sos «adláteres» (que diría José Mª García) llucharon por evitar durante tantu tiempu. Un miembru de los Borbones, esos Reis calamitosos que gobernaron España per munchu tiempu, tuvo que se sentar nel «banquín» pa responder d’unes acusaciones de corrupción, blanquéu y otres coses asemeyaes. Pa min, l’oxetivu ta cumplíu. Falta, claro, la sentencia de tou esti enguedeyu y si la Infanta, talo que’l so maríu, ye culpable o non. Pero eso tien de quedar yá en manes del xuez Castro al qu’hai que presuponer imparcialidá y xusticia. Lo qu’él diga, salvo escándalu en contra, va a misa.
Creo, entós, que ye llegáu’l momentu de dexar descansar un poco’l tema, sobre too porque esti asuntu tien una parte de «divertimentu de salón» que ta tapeciendo otros temes abondo más importantes. Temes nos que tán en xuegu vides humanes. Asina, el fechu d’esos catorce inmigrantes (por agora) muertos a les puertes d’España clamia’l cielu y pidi una solución a esi escarniu, a esi goteru de muerte que ye la frontera sur de la Comunidá Europea.
Porque nel fondu esti problema, como’l de la islla de Lampedusa, nun son problemes puntuales d’España o Italia, son problemes de tou un continente, una xunión de paises d’esi llamáu Primer Mundu a cuyes puertes, «cautivos y desarmados», piquen llastimosamente un puñáu de seres humanos. Poro, doña Ánxela Merkel, el señor Hollande y esi Cameron que nunca fue amigu de la CEE hasta que se-y echa enriba la independencia escocesa, nun puen mirar pa otru
llau. Ellos viven nel salón de la casa, xunto a la chimenea, dende’l que nun se siente quien llama’l timbre. Pero los que vivimos n’antoxana nun podemos (nin debemos) dexar de sentir los puños que golpéen a la puerta. Seguro que nun ye un problema de fácil solución, pero hai que lo intentar. Y demientres s’intenta, polo menos hai que poner fin a esa sangría que, un día sí y otru tamién, asuela al nuestru país: ¡Más de 20.000 muertos, dende 1988, nel pasu del Estrechu!
El ministru del interior va a comparecer delantre’l Parllamentu: A ver qué desplicaciones da. Espero que seyan convincentes y sobre too, que ponga tol so enfotu y el de les Señoríes que lu van a escuchar, pa que coses como la d’esos catorce muertos nun vuelvan a pasar. La llei ye la llei, pero la seguridá y la vida de les persones tien de tar, siempre, penriba de too. Asina que vamos aparcar a la señora Infanta nel «banquín» al que la llevamos, y vamos dedicanos a otros temes de mayor importancia. Anque nun seyan tan «mediáticos».
