close
Don Gabino «el nuestru» y la llingua asturiana

Don Gabino «el nuestru» y la llingua asturiana

Páxines y más páxines publíquense estos díes nos periódicos, y n’otros espacios de radio y televisión, por mor del fallecimientu del que fuere Obispu d’Asturies don Gabino Díaz Merchán. Toos ellos, ensin esceición, pa emponderar merecidísimamente la figura d’esti gran cura y paisano al que nada-y fue ayeno, y qu’alcontró na nuestra tierra un segundu (o primeru) llar, pa elli que venía de tierres toledanes tan estremaes de la nuestra.

Hai, ensin embargu, coses que rinchen demasiao pa nun tener que destacales nesta pequeña necrolóxica que-y dedicamos dende esti modestu blogue. La primera que destaca ye la d’otros obispos de la diocesis asturiana, que tuvieron nes antípodes del papel que xugó don Gabino «el nuestru» y agora desfáense n’allabancies del so antecesor. Un ye’l llamáu Carlos Osoro, paisano enllenu soberbia y qué pasó perequí esguilando pa otros puestos «de mayor altor». Un home que despreció en delles ocasiones a la nuestra llingua, una d’elles nel multitudinariu funeral del gran Fico Fierro-Botas, nel que nun dixo pallabra sobre’l so importantísimu llabor en favor del asturianu nin, por supuesto, se pronunció dala pallabra nesi idioma. Al puntu que, a la salida, hubo xente que s’avalanzó sobre’l coche nel que marchaba, pa recriminalu nesti sen. Un d’ellos, alcuérdome bien, el Presidente de l’Academia de la Llingua Xosé Lluis García Arias. Y hubo otros desprecios paecíos. Tamién citaría al actual obispu, del que namás voi dicir que, al llau de Díaz Merchán, paez sacáu del país de Liliput.

Pero otra cosa que rincha tamién (polo menos a min) ye que, ente tantes páxines, espacios y autores, nun hai nengún que destaque la so rellación cola nuestra llingua y la nuestra cultura. Sí, claro, el Covadonguismu, y ehí acabóse. Pues hai que recordar que don Gabino Díaz Merchán fue nombráu Sociu d’Honor de la Fundación Caveda y Nava, nel añu 2003, na Casa de Cultura de Villaviciosa. La Fundación Caveda y Nava, de la que fui sociu fundador, tenía como oxetu: «… afianzar en todos los sectores de la sociedad asturiana el respeto, el aprecio y la defensa de la lengua asturiana como patrimonio cultural y como derecho cívico de todos los ciudadanos del Principado de Asturias, buscando el máximo consenso basado en la pluralidad, a fin de que la preocupación por la situación y el futuro de esta lengua llegue a ser una obligación ética y forme parte del acervo democrático de la sociedad asturiana.» Don Gabino aceutó encantáu formar parte, como sociu d’honor, d’una Fundación que defendía, p’algamar los sos fines, la Oficialidá del asturianu. Y recuerdo tamién, les sos emocionaes pallabres cuando n’aquel actu dixo que, al poco de llegar a Asturies, diose cuenta de que tola xente que se dirixía a elli pa cunta-y los sos problemes, o les tristeces d’una situación dificil, facíenlo nuna llingua que nun yera’l castellán. Y reflexonó diciendo que, si esta xente, pa espresar los sos más íntimos sentimientos emplega l’asturianu, ye que sí ye verdá qu’esiste y que ye la so llingua.

En fin, cada un que saqué les sos conclusiones pero que nun nos cambien la verdá agora qu’elli yá nun ta. Y anque yo nun soi creyente, prestaríame que por un momentu esistiere esi cielu de los cristianos pa qu’ellí descansare eternamente don Gabino «el nuestru». Un gran paisano y un asturianu de pro.