Ún de los periódicos de más prestixu del mundu, The New York Times, ta acabante de sacar una riestra d’ártículos sobro’l fraude fiscal n’España. Gran parte d’ellos céntrase na figura de don Emilio Botín, Presidente del Bancu Santander, pero más na so estaya personal que na que cinca al trabayu de la dicha entidá financiera. Nun pequeñu artículu publicáu pol profesor Vicenç Navarro, Caderalgu de Ciencies Polítiques de la Universidá catalana Pompéu Fabra, recuéyese esti estudiu del periódicu norteamericanu que, por cierto, nun fue publicáu per nengún de los rotativos españoles, lo qu’implica’l nivel de pánicu escénicu (o coses peores) de la nuestra prensa.
The New York Times destapa la esistencia d’unes cuentes secretes que, dende la Guerra Civil, caltién la familia Botín na Banca Suiza HSBC. Nelles hai depositada la cantidá de dos mil millones d’euros nunca declarada a la Facienda del Estáu Español. Fue por mor del «despechu» d’un empleáu de la citada entidá, pol que se ficieron públicos los nomes de los titulares d’otres cuentes ellí asitiaes. Hai ente ellos, amás de la familia Botín, otros 568 españoles, como por exemplu, el padre del President de la Generalitat, señor Artur Mas.
El fraude fiscal, afirma’l periódicu neoyorquín, ye práutica común n’España ente les grandes families financieres y empresariales, cosa que yá imaxinábemos pero qu’agora, col prestixu del acusador, persabemos de mou seguru.Pero
ye que, amás, la propia Axencia Tributaria española diz qu’esi fraude de les poques families de les que falamos, correspuende al 74% del fraude total. Una cantidá que se cifra en 44.000 millones d’euros que les arques españoles dexen d’ingresar. Esto supón cuasi la cantidá que’l nuestru país debería gastase nel llamáu Estáu del Bienestar (sanidá, educación, dependencia…) y que nun s’ingresa por esta descomanada bolsa de fraude. Eses mesmes fontes tributaries afirmen que les inspecciones céntrense nes profesiones lliberales y los autónomos, que representen namás el 8% del fraude total.
Ye perclara la forma en que, dende los poderes públicos, se protexe a persones como’l señor Botín y otros «conxéneres». Asina The New York Times cita’l casu del presidente de Telefónica, señor César Alierta, que taba siendo investigáu pola Facienda Pública, y el xuez ordenó aparar les investigaciones «porque pasare munchu tiempu dende los fechos hasta la presentación delantre’l tribunal», lo que comenta con muncha «coña» el periódicu. O, amestamos nosotros, l’indultu concedíu pol gobiernu socialista, en payares del añu pasáu, a don Alfredo Saenz, presidente executivu del Bancu Santander, a una selmana del trespasu de poderes.
Ye murnio que nun momentu de crisis tan grande en que se ta afogando a la xente con más impuestos, recortes de salarios, posibilidá de despidu práuticamente llibre… más cinco millones de paraos, la clas política y xudicial mire pa otru llau mientres les grandes fortunes del país defrauden unos 44.000 millones d’euros que, por sí solos, podíen solucionar el global d’un estáu del bienestar que costo muncho algamar. Y otra reflexón. ¿Ónde ta la defensa del ciudadanu de la que se faen portavoces los grandes periódicos españoles? O lo que ye lo mesmo: ¿Ónde ta la tan cacarexada llibertá de prensa? ¿Qué compromisu tienen con esos grandes capitalistes defraudadores? A poco que se piense, nun ye difícil d’imaxinar.
