Fue na época posfranquista onde entovía pervivíen les zunes y vezos de la dictadura. Nel añu 1976 un miembru de la Policía Llocal de Cáceres, el llueu famosu Cabu Piris, entró na «Librería Figueroa» y dixo que quitaren inmediatamente la lámina que teníen nel escaparate, por ser inmoral, ímmpudica, vejatoria,, pornográfica y delles coses más. La lámina en custión yera una reproducción de la «maja» de Goya a tou color. La señorita Charo Figueroa, la propietaria, conminada pola autoridá competente, fizo casu al cabu Piris retirándola, pero la multa en cualquier casu cayó-y. Y creo recordar que’l plenu del ayuntamientu de la so ciudá, ratificó dicha multa por dir acordies coles ordenances.
Viénome a la memoria esti fechu, ridiculizáu llueu n’España y fuera d’España hasta la fartura, al lleer lo de la famosa «maja» de Cubiella, sita nel barriu del Carmen, onde una institución que debería defender y trabayar pola equiparación de les muyeres, que por desgracia entovía nun se llogró, dedícase a facer el papel que nel vieyu programa de «Un, dos, tres», de Chicho Ibáñez Serrador facíen aquelles «supertacañones» o como quiera que se llamaren, que portando unes grandes tixories, cortaben cualquier escena que fuere, a los sos güeyos, poco decorosa o adecuada.
Principia a ser preocupante esta nueva brigada «anti-viciu y males costumes» porque por esi camín vamos volver a la época de la Inquisición. Toos somos conscientes del emplegu y la utilización de la imaxen (nun sólo de la muyer, claro) pa temes de publicidá y collaterales, pero d’ehí a facer patrulles de barriu pa denunciar a los comerciantes que nun s’axusten a les sos midíes morales tien d’haber un gran cachu. Y si lo que quieren de verdá ye quitar esi tipu d’anuncios d’homes y muyeres con poca ropa, que tiren por elevación escontra les grandes empreses multinacionales que gasten nello miles de millones d’euros. Y dexen en paz a los señores «Cubiella» y les sos humildes fotocopiadores.
