Con gran despliegue mediáticu, despilfarru económicu y abondos sofitos estatales, anúnciase la prósima visita de S.S. (ese punto, ese punto, que dicía el gran Jerónimo Granda) el Papa de Roma. Como a tan altu cargu relixosu y políticu se-y aplica lo de la llibre circulación de persones (non como a los rumanos que, anque son de la Comunidá Europea tienen cupos), nun hai nada qu’oxetar de que vaiga de visita a onde-y pete. A España, por exemplu.
Dicho esto, paez escesiva (por poner una axetivu mui suave) la forma en que va a manifestase esa estancia vaticana. Ocupación de espacios públicos, zarraos pal restu los ciudadanos, como la Plaza de Cibeles, el Parque del Retiru… Calles cortaes al tráficu. Y un despliegue de miles de policíes, guardia civil y exércitu que’l periódicu cifraba n’unos 30.ooo efectivos. Supongo, y eso nun lo ponía la prensa, qu’ello arrecostina tamién con servicios especiales de llimpieza, basureros, servicios mélicos, y otros abastecimientos públicos necesarios pa talos menesteres.
Too ello supón, amás d’un ensame de perxuicios ya incomodidaes a la ciudadanía que nun tenga res que ver col tema, un incumplimientu de la Llaicidá del estáu, que toma ampliamente partíu pola confesión católica, a la que yá caltién económicamente pol famosu «concordatu col Vaticanu. Y unos gastos estras, valoraos en munchos millones que suponen toes eses movilizaciones qu’enantes detallamos. Ye verdá que tamién dalgunes empreses y particulares fadrán l’agostu, pero eso dirá pa los sos bolsiellos, mentantu que los gastos pagarémoslos entre toos.
Pa más inri (creo que vien bien la pallabra), a esti Xefe d’Estáu que vien de visita, se-y consiente que nos insulte y que
nos critique, porque nun atopo otra pallabra meyor que «insultu» el criticar determinaes lleis que nos tenemos daes y que cuenten cola aprobación de tolos poderes del estáu, inclusive del Tribunal Constitucional. A naide que venga d’invitáu se-y debía permitir criticar a un estáu de derechu como’l nuesu y a la forma que nos damos de convivencia y funcionamientu. Pero el Papa, ya sabemos, tien bula.
En Xixón, los partíos de derecha (P.P y Foro), refuguen la Selmana Negra porque ocupa determinaos espacios públicos y xenera gastos de llimpieza y cuidáu. Supongo, entós, que tarán tamién a la escontra de la visita del Papa que produz eso mesmo, pero aumentao ad infinitum. Asina que voi lleer estos díes los «papeles» a ver ónde veo la condena d’esa visita, anque Benedictu nun s’apellide Taibo.
