Esi vezu tan humanu de dividir el tiempu en cachinos, como si fuere un quesu en porciones, pa crear los díes, los meses y los años, algama la so másima espresión en llegando a lo que llamamos «fin d’añu», como si daveres fuere’l fin de dalgo y non la continuación d’esa llinia, llarga ya indeterminada que s’espurre, creyemos qu’hacia alantre. Pero vete tu a saber.
Y ye nesi supuestu «fin de dalgo», cuando tol mundu cree que tien derechu a fadianos resumiéndonos lo que, al so xuiciu, asocedió ente eses dos marques del calandariu que llamamos, por llamalo de dalguna forma, l’añu 2012 y el 2013. Y asina, dende’l Papa, hasta l’últimu monu na escala social, llárguennos la so peculiar visión d’estes 365 (nalgún casu 366) «marquines» que conocemos como «díes». Llóxicamente nun hai nenguna coincidencia nos resumes, pues caún alluga ehí tolo que-y interesa, refugando lo que nun ye del so agráu. Ye, pues, un exerciciu inútil que, como tolos exercicios inútiles, nun val pa nada. Toos ellos rezumen «ideoloxía», nel peor sen de la pallabra.
El Papa fala del valir de la familia, escaeciendo, cuando non «escarneciendo», a esos otros matrimonios que, con tol derechu del mundu xúnense por amor, al marxe del sexu o d’otros condicionantes sociales. El Cazador de Botswana,
danos una riestra recomendaciones ensin nenguna autocrítica pola so parte, pese a lo de los elefantes y a otros diversos animales que tien mui cerca. Por cierto, nun se vieron, ente les semeyes que facíen el decoráu dende’l que nos instruyía, nenguna del maríu de la so fía. Igual ye porque taba declarando delantre del xuez. Del otru xenru, como de Gurb, tampoco nun hai noticies. El Presi (non el famosu Arturo Vigón, ya fallecíu) de tol Estáu Español, el señor Rajoy, echó balones fuera como si la cosa nun fuere con el. Probe, ¡vaya la que-y armaron los socialistes…! Nun tuvo más remediu que desmontar l’estáu del bienestar… pol nuestru bienestar. Y pa crear empléu, vese forzáu a llegar a los 6 millones de paraos. Ye así, bobín, qué vas facer. En cuantes a don Javier Fernández… tengo de confesar que nun lu lleí. Taba yá agotáu de tantu discursu importante y nun me quedaben fuerces nin neurones pa sentilu. Ye una pena, porque seguro que dixo coses interesantes. Pero, bono, un añu pasa en seguida, y total van repetir lo mesmo d’esti añu, asina que yá tendré tiempu a enterame. Eso sí, que dalguién m’avise si, por un aquello, a mediu añu deciden facer oficial al asturianu. Nun vaya a ser que nun m’entere, y llegue a los prósimos turrones ensin beber la botella de Sidra El Gaiteru que tengo enfriando na nevera. Y ye que d’estos «próceres» pue esperase cualquier cosa.
En fin, que trataba de facer el mio propiu resume, pero yá nun me queda sitiu. Otru añu sedrá.
Post scriptum.- Tantu papel escritu y tantu datu, pero naide nos lo dixo: Por fin ¿cuántos pantanos s’inauguraron esti añu, ho?
