Les poques veces qu’escribí de fútbol nesti blogue yá lo tengo dicho: el xuegu del Barcelona aburríame soberanamente (o seya, como si fuere de la Casa Real). Esi xuegu que volvía llocos a los periodistes deportivos, que lo bautizaron mui acertadamente como’l «tiqui-taca», paecióme siempre un «peñazu» que nada tien que ver cola idea que yo, quiciás un poco románticamente, atalanto que ye’l fútbol. Polo menos el qu’a min me presta. Claro, ganaben, y entós too se xustificaba, los pases y repases, los «rondos», el pasiquín al d’al llau o al d’atrás… como si fuere un entrenamientu. Llueu dáben-yla a Messi o a cualquier d’esos super-clases que teníen, y metíen la bola pa dientro. Guapísimo.
Pero’l fútbol pa min supón velocidá, riesgu, disputa, valentía… Esos valores que ficieron del llamáu «deporte rei» (otra vuelta la Casa Real) el más siguíu de toos. LLueu, migayín a migayu, principiaron a «amaneralu» perdiendo les distintes llinies de los equipos la so función primaria: los defenses yeren defenses, fuertes, contundentes, espectaculares: el nuestru Campanal, Garay, el propiu Maceda. Los centrocampistes complementarios, los creadores, áxiles, intelixentes… y los defensivos, pa «barrer» y axudar a la defensa. Los estremos, que corríen la llinia y centraben y llueu, aquellos delanteros centro que remataben tolo que-yos llegaba y que metíen mieu a los defenses: Zarra, Arieta, César, Santillana… Quini. Depués vieno eso que llamaron «fútbol total» que, n’efeutu, yera total, pero nun yera fútbol. Toos facíen de too. El falsu nueve. Los «rondos». Recuerdo que cuando yo xugaba al fútbol y venía un nuevu entrugábes-y: «¿Y tú de qué xuegues?» Si dicía: «Yo xuego de too», el comentariu que facíamos yera: «Xugador de too, xugador de nada«. Nel Barcelona toos yeren xugadores de too. ¿Cuánto fai que’l Barça nun tien un delanteru centru, como Diego Costa o como Adúriz, por citar a dos que nin siquier son «figures»? Dalgún tuvo, como Etoo o Ibrahimovic, pero llargólos Guardiola porque seguro que nun yeren xugadores «totales» y, amás, estorbaben a Messi.
En fin, qu’agora que’l Barça perdió la Copa y la Champions fálase de «final de ciclu». A min abúltame que nun ye tanto «de ciclu», como de sistema. Yo nun creo qu’Iniesta, Pedro, Busquets, Piqué y otros tean «acabaos». Nin muncho menos. Nin siquier l’agora criticáu Messi, que dándo-y un descansu, sobre too mental, entovía tien de rendir abondo. Lo qu’espero que toqué al so fin ye esi sistema aburríu, reiterativu, de partíu de Balonmano, de «tiqui-taca» que, si-y quites les victories, repuna a les piedres. El Madrid, ensin facer nada porque tampoco nun tien un sistema fixu, namás defendiendo bien y corriendo al contrataque, ganólu merecidamente. Hai qu’esaniciar el sistema de Guardiola, que tuvo’l so momentu pero quiero creyer que yá pasó. A tal puntu llega la cosa que’l propiu Presidente del Bayer, el míticu Beckenbauer, diz que s’aburre «soberanamente» nos partíos del so equipu, y eso que lo ganen too. Imaxínate’l públicu rival: pa mexar y nun char gota.