Llego de secar unos díes per tierres llevantines, porque esti branu taba ya más remoyáu «que garbanzu qu’espera cocíu», cuando namás aportar preséntaseme nel cuartu el famosu síndrome de la «posfolgueta». Depués de falar un cachu con él, comencilu de que nun esiste, que ya namái una pantasma, asina que fízome casu y coló per onde viniere. El casu ye que quedé un cachu pensatible, delantre l’ordenador, ensin saber mui bien de qué escribir, porque les noticies arrexúntense y nun sabe un si escribir del inútil y tramposu cambiu de la Constitución, o de la probe política municipal qu’anda a un altor que, más qu’altor ye «baxor». Asina que tomo pel camín del mediu, que nun ta señalizáu y falo de la yá prósima, avezada y esperada «Arribada» que, tolos años per estes feches, preséntasenos cargada de novedaes.
No qu’a mi respeuta, esti añu voi de «mocín», porque amás de tener que recoyer el Premiu Timón (¡¡¡bieeen!!!), el sábadu 17, la selmana que vien tócame tamién trabayar. El llunes 12, cola presentación del album «Deva y yo» (nun vos perder la esposición de los orixinales na planta primera del Antiguu Institutu, son preciosos), y el xueves 15 cola presentación de «El Norte. Cuentos 1976-2010» a cargu de la profesora y crítica lliteraria Rosana Llanos, que toi seguru de que va a prestavos. Asina que va a haber que llantar una tienda campaña nel patiu del Institutu par nun perdenos nada de la completísima selmana que nos ufierta l’Arribada. Hai de too: presentaciones, música, alderiques, etc. ¡Y too de baldre! Tienen el cielu ganáu.
