«Estáu de sitiu» ye una perinteresante película de Costa-Gavras, el direutor de cine franco-griegu, qu’interpreta Ives Montand, un altu miembru de la CIA secuestráu, creo que polos Tupamaros. Pero «Estáu de sitiu» ye tamién la situación na que s’alcuentra nestos momentos ASturies. O meyor, los asturianos.
La coincidencia de dos güelgues llevaes por métodos, vamos llamar eufemísticamente «espeditivos», ta somorguiando al nuestru País nuna espiral de violencia que raro sedría que nun finara con dalguna desgracia. Ye cierto que la situación económica del País (el nuestru y el más grande) ye la que ye, y esi estáu de coses lleva a la sociedá a una situación de desesperación porque cuando ún nun tien trabayu, nin recursos que lu sostituyan, la cosa tien de romper por dalgún llau. Nun se pue vivir del aire, y ye cierto qu’hai que lluchar por sobrevivir y por defender, como se diz vulgarmente, «la pancheta».
Pero dicho eso, creo que too tien que tener medida porque afondando na violencia nun se sabe a ónde se pue llegar.
Posiblemente a que paguen el patu, como lu tán pagando, persones inocentes. Una gran parte de la sociedá asturiana ta siendo «rehen» d’una situación qu’ellos nun provocaron, y que ta afectando de tal mou al sistema de convivencia de los Asturianos que lu fai, dafechu, insostenible. Amás que tien tola pinta de llograr l’efeutu contrariu al que se pretende: que dalgunes empreses o servicios a los que se torga’l funcionamientu se vaigan pa otru llau, o cenciellamente, abandonen el negociu con desesperación. Ye un pulsu que quiciás dé bon resultáu a los que lu practiquen, pero a costa de perxudicar absolutamente al restu’l País. Los cortes de carreteres, el corte de los accesos a los puertos, la quema de neumáticos, les pedraes e incendios a autobuses, inclusive enantes de declarase la güelga… provoquen una situación social llímite, que vien a engrandar la xeneral problemática del restu de la población que tampoco lo ta pasando precisamente bien.
Y ye que, amás, la güelga del tresporte nun dexa de ser una güelga ente una empresa y los sos trabayadores. Y la entruga ye: y si pa cualquier desacuerdu ente patronal y trabayadores tenemos que cortar carreteres ya incendiar autobuses ¿qué país vamos a dexar? Porque diariamente vemos nos periódicos diferencies salariales o d’otru tipu en munches empreses, y non por eso la xente provoca un estáu «de sitiu».
En cuantes a la minería, seguro que tienen razón los mineros, pero esti procesu nun principió agora. Yá va años qu’en Bruseles se decidió la fecha de zarre de gran parte de les mines, por cierto, col votu favorable de los socialistes europeos incluyíos los españoles. Y el propiu comisariu Almunia, puestu ehí pol PSOE, nun dexó nunca de falar del puntu final de la minería como dalgo necesario. Y a esti puntu llegóse depués de munchos miles de millones de pesetes en subvenciones, y en Fondos Mineros, que yo nun digo que s’esbayaren, pero que nun sirvieron pa preparar una situación pa cuando les mines yá nun funcionaren. Emplegáronse n’otres coses, de xuro tamién interesantes, pero non pa esa necesaria sustitución.
Poro, a pesar de qu’esto que digo pueda ser impopular, abúltame qu’hai que reconducir les coses con racionalidá, enantes de que seya tarde y surda dalguna desgracia. La minería, como un recursu propiu, tendría de tener un futuru anque fuere llimitáu. Pero esta situación de «caos» xeneralizáu nun se pue caltener indefinidamente como amenacien. Habrá que buscar nueves formes de negociar, ensin perder del derechu.
