Títulu: «Shakespeare y la ballena blanca»
Autor: Jon Bilbao
Editorial: Tusquets
Añu: 2013
UNA FÁBULA SHAKESPEARIANA.- Va unos meses reseñé un prestosu llibru de cuentos del autor asturianu Jon Bilbao (Ribesella, 1972) que llevaba por títulu «Bajo el influjo del cometa». Tratábase d’ocho cuentos, los cuatro primeros mui guapos y los otros cuatro dalgo menos. Nesta nueva obra Bilbao ufiértanos una novela, anque un aquello peculiar. L’argumentu cuenta un viaxe marítimu del gran William Shakespeare, nuna espedición unviada pola Reina Isabel d’Inglaterra a Dinamarca pa rendi-y honores al rei Cristian IV y, de pasu, apertar los llazos de collaboración política. Na nave Nimrod viaxen marineros, militares y una compañía teatru comandada por don Guillermu. Al pocu, produzse una estraña situación n’alta mar y el galeón queda práuticamente paráu por falta vientu. Nesi escenariu, apaez una enorme ballena blanco, enllena d’arpones que-y cuelguen y arrastriando unos calabres en descomposición. Dalgo qu’apavoria a los pasaxeros. Nesa dómina, el poeta inglés taba planteándose llevar al escenariu escenes de la vida que superaren los pequeños escenarios del teatru. La idea de representar el drama de la ballena, y un capitán obsesionáu con ella y dispuestu a too pa matala, pasa pel so maxín con fuercia. Tamos, pues, adelantándonos en 250 años al Moby Dick de Melville nuna fábula interesante.
La novela ta encadarmada en dos grandes escenarios: per un llau’l barcu y les incidencies cola ballena, y per otru con alcordances de la vida del autor, la so rellación cola muyer y los fíos, el so procesu creativu… Anque’l tema ye suxerente, costóme avanzar col rellatu que me resultó dalgo repetitivu y un migayín lentu. En cualquier casu ye un llibru interesante que, al mio paecer, meyora na so parte final, onde les escenes del ataque de la ballena tienen fuercia y emoción. Creo que l’autor confirma’l so bon pulsu narrativu, y cuido que tendremos coses meyores nel futuru.
