Espero, a posta, unos díes pa falar del fallecimientu de Manolo Preciado porque ye tan descomanao, tan desaxerao tolo qu’arrodia a esti tema, que preferí aguardar a la «baxamar» pa dicir dalguna cosa. La primera que llamento fondamente la so muerte. Un paisano de 54 años que paez «marcáu» pola desgracia, y nun voi deteneme na riestra muertes al so alredor porque la prensa ya lo asoleyó abondamente estos díes. Un paisano, amás, que cayía bien, pola so llaneza, pol so calter popular y por esa forma de falar «campechana» que la xente tanto valora. Quiciás demasiao, porque recuerdo otros casos de «campechanía» qu’arrastraron a dalgunos incautos: Ruiz Mateos, Jesús Gil… Nada que ver, dende llueu, con Preciado que yera eso que perequí llamamos (y agora póngolo entecomillao) «un paisano».
Como entrenador tuvo de too, por más qu’agora paeza que yera’l meyor del mundu, escaeciendo qu’esti añu dexó, práuticamente, al equipu en Segunda. Pero tamién ye verdá que tuvu munchu méritu lo del ascensu, y el poder caltenese un par d’años nuna Primera mui complicada y con baxu presupuestu. Yo yá tengo dicho equí que yera un bon lider de vestuariu y de comunicación, pero un mal estratega. Pero, al marxe de la so «bonomía» como persona o de la so capacitación como entrenador, lo que quiero resaltar güei ye’l verdaderu desmadre que xeneró’l so fallecimientu. Porque una cosa ye facer un reconocimientu espresu, por parte del que fue’l so equipu durante 5 años, y de los aficionaos que lu puedan echar de menos, y otra que se quiera amestar el so nome al del santoral.
Siempre dixi que’l fútbol tien de tener un componente importante de pasión. Un partíu nel que naide se xuega nada,
o nel que los equipos que contienden nun nos importen muncho, resulta aburridísimu, anque sobre’l campu podamos ver «esquisiteces». Y a la escontra, un partíu del nuestru equipu, sobre too si se xuega dalgo, da lo mesmo que seya de los de «patadón p’alantre», que nos tendrá col alma en vilu. Por eso esti deporte da tanto que falar. Pero una cosa ye la pasión, l’entusiasmu o como queramos llamalo, y otra mui distinta eso que se nos vien introduciendo dende va un tiempu que ye «la mística». Una mística que ye una especie de «relixón llaica» al rodiu d’esti deporte o de la xente que lu prautica. Toes eses frases, por cierto, copiaes del fútbol inglés de «Nunca caminaréis solos». O «con vosotros hasta la muerte». Y otres munches, cada vuelta más refinaes, son d’una cursilería y d’una ñoñez qu’espanta. Nun digamos ya cuando se produz, llamentablemente, dalgún fallecimientu. El famosu Jarque del Español, o aquel otru del Betis del que nun recuerdo’l nome, que finen convertíos en «santos llaicos», con frases como «siempre presente» o coses pol estil, que me recuerden a los sagraos muertos franquistes como Jose Antonio Primo de Rivera. Agora que la relixón ta «de capa cayía», pues cada vez menos se prautica, vamos crear otru tipu de relixón como si el ser humanu necesitase siempre d’una creyencia nel «más allá».
Por too ello, y llamentando, como dixi, el fallecimientu de Manolo Preciado, falar de toes eses coses como «santuariu», «reliquies», «el templo», etc. etc. paezme que ye sacar les coses de quiciu y dar una dimensión metafísica a dalgo que, por muncho que pueda prestanos, nun ye más qu’un xuegu.
