La llucha de clases ye un términu en desusu. Esi conceutu marxista que tuvo un momentu d’esplendor nel mundu, cuando se falaba del proletariáu y la burguesía, y de los esplotadores y los esplotaos, y de los propietarios de los medios de produción, y de la plusvalía cola que se quedaben éstos pal so arriquecimientu y etc. etc. Too eso pasó, son pallabres vieyes que yá naide emplega. Agora nun hai proletarios. Naide lo quier ser. Toos somos, más o menos, clas media. Unos más media qu’otros, pero proletarios ¡qué va, ho! Y los empresarios yá nun son esplotadores, nin se queden cola plusvalía, otru conceutu en desusu. Agora los empresarios son creadores de riqueza y de puestos de trabayu. Y quierse que toos aspiremos a ser empresarios, como los famosos «emprendedores». Un cuentu cagáu pa xustificar la xente que ta nel paru. Somos, pues, una sociedá igualitaria, o vamos camín d’ello.
Sólo hai un sitiu onde entovía puen aplicase los términos marxistes: el fútbol. Y ye que ehí si que nun hai posibilidá
d’engañu, nin de terminoloxíes modernes, ehí la contradición del sistema apaez al descubiertu. Tán los grandes clubes: el Madrid, el Barsa, l’Atleti… y dalgunos otros «compañeros de viaxe». Y llueu tán los desarrapaos, los desheredaos de la fortuna. El proletariamen, unos más «lumpen» qu’otros. Y los grandes clubes, los capitalistes, esploten vilmente a los otros, y pa ello cunten colos estamentos represores: la Lliga de Futbol Profesional, la Federación Española de Fútbol, la Comisión Nacional d’Árbitros, les televisiones, los diarios deportivos, los periodistes vendidos que canten penalties o non, según pa que llau seya. Toos ellos xúntense pa esplotar a los probes, pa rise d’ellos, pa demostra-yos, un domingu sí y otru tamién, quién manda nesta lliga que, por si hubiera dulda, tien nome de Bancu: la lliga BBVA.
Sabíemoslo, pero por si acasu dalgún lo escaecía, esti sábadu nel Nou Camp volvieron a demostránoslo. Esplotáronnos, riéronse de nós, aplicáronnos les sos lleis y los estamentos represores utilizaron la so fuercia bruta p’avasallanos. Yo, de ser el dueñu del proletariu Sporting, retirábame. Dexábalos a ellos solos. Que xugaren unos escontra otros. Que se mataren ente sí. Cualquier cosa en llugar de siguir siendo un xuguete nes manes capitalistes teniendo qu’asistir, un domingu tres otru, a que nos roben la plusvalía.
