Igual ye que toi faciéndome vieyu y, poro, más pexigueres ya intransixente, pero ca vez aguanto menos el ruíu. Llego a entrugame si Beethoven escribió la Novena gracies a que taba sordu, y nun pudo ser molestáu por vecinos ruidosos. Pero’l fechu ye que cuasi cualquier manifestación del espíritu, vien acompañada del atronador soníu de cohetes, petardos, voladores y demás artillería, con o ensin bala, pa que se sepa que tamos pasándolo mui bien. Tal paez que si nun enteramos de forma atronadora al próximu (y prósimu) de que tamos de fiesta, l’esfrute nun ye completu.
Asocede que nel branu, tolos barrios, aldees, pueblos y demás agrupaciones d’eso que llamamos persones, deciden que tienen drechu a pasalo bien y entamen fiestes, verbenes o romeríes, aprovechando cualquier disculpa, relixosa o pagana, p’alborotar el gallineru. Yo paso esta época estival nuna casina, de los suegros, nel altu Deva. Pues bien, nun hai selmana en que, pola mor de la Virxen-del-nun-se-qué, que ye patrona-del-nun-sé cuanto, me pongan atarraquitáu de «pólvora y perdigón», como al gurrión: Les fiestes de Deva, de Quintueles, de Quintes, de Candanal, de Riosecu, de San Miguel… Veo les lluces, allalantrones, y digo: «Non, dende ellí nun pue oyese’l ruíu». ¿Que non? Como diría Villa: «caguenmimantu» vaya si se siente. L’otru día, les de Quintes, mira tú que taba lloviendo, y la orquesta tuvo tocando hasta les 4 de la mañana «La de la mochila azul», que tal paecía que tábemos nel prau de la romería. Y cuando acabó, y ya díbemos pa la cama (enantes imposible), ¡ehí va!, una traca de cagase. Pa que te quexes por dalgo.
Nun sé yo que necesidá habrá de ser tan ruidosos. Enantes tamién había romeríes, y voladores, y verbenes. Pero nin
duraben hasta tan tarde, nin los decibelios trespasaben la barrera del soníu. Y lo mesmo asocede coles fiestes nes ciudaes. Baxamos a dar una revolada pol pueblu (Xixón) y tuvimos que colar de la Plaza Mayor, onde tocaben tres portugueses, porque la posibilidá de quedar sordos yera d’un 95 por cientu. Salimos pal Muro, y taben los de los aviones faciendo virgueríes, que nin te cuento. La Selmana Negra; la Descarga de Cangas de Narcea; los tambores de Calanda… En fin, cuido que los algodones, pese al copagu y la xuba del IVA, sigan siendo baratos porque l’alternativa ye’l suicidiu.
Pido perdón por esti desfogue lliterariu, pero ye que tamos llegando a un puntu en que vamos tener que salir a la cai con megáfonos, como si fuéremos de Comisiones Obreres, pa poder dicir al vecín: ¡¡¡BONOS DÍES, QUÉ TAL TAMOS!!!
