Ye una de les espresiones que más me fieden de la política. Cuando los gobiernos que salen de les urnes tán disculpándose tiempu y tiempu de les sos incompetencies, emplegando esi términu de «la herencia recibida» de los gobiernos anteriores. Pero ye verdá que dalgunos gobiernos (municipales, autonómicos…) dexen unos «panchos» a los que vienen detrás que marquen mui negativamente’l so llabor futuru.
Los socialistes, que gobernaron n’Asturies y en Xixón a lo llargo la mayoría’l tiempu de democracia, dexaron una herencia de meter mieu. Dirixeron la ciudá más poblada, y el nuestru País, como si fuere’l so «cortijo» y asina, dende va munchu tiempu, nun aparen de salir les metedures de pata (por llamalo de mou sele) que fueron dexando perequí y perallá. En Xixón yá sabemos, la más gorda l’anulación xudicial del Plan Xeneral d’Ordenación Urbana, el mandáu más importante d’un municipiu. Pero xunto a ello otros milenta «pufos», como lo d’un metrotrén nel que se sapozaron (nunca meyor dicho) balagares de perres y que nin furrula nin tien pinta d’ello. Lo del Plan de Víes, que ta en «vía muerta». Lo del tarrén del Campus de Viesques, nel que se gastaron unes perres pero que llueu nun yera d’ellos, sinón de la Universidá. Lo de la EMA, onde hai exconceyales n’espera de xuiciu. Y, a la fin, en tolo que, un día sí y otro tamién, vien apaeciendo na prensa.
Nun lo ficieron meyor los gobiernos socialistes del Principáu, colos tribunales ca poco anulándo-yos unes y otres actuaciones y con unes decisiones polítiques que nos llevaren a que, na última estadística, el paro xorreciere n’Asturies cuatro veces más que nel conxuntu del Estáu. Y nun digamos yá de la falta «respetu» que se nos tien dende’l Gobiernu Central, cuando nos prósimos Presupuestos Xenerales la inversión del Estáu nel nuestru país ye ridícula, siendo a la que más taracen de toles comunidaes españoles.
El caberu fallu xudicial escontra esos gobernantes ensin rumbu nin timón ye’l rechazu a la Regasificadora del Musel, una obra escontra la qu’hubo un fuerte rechazu popular, aconceyáu na Plataforma «Regasificadora Non», que criticaba l’escurantismu de les obres (ensin llicencia municipal), la pergrande pelligrosidá del emplazamientu, y lo innecesariu del gastu dafechamente al marxe de les necesidaes enerxétiques asturianes. Recuerdo tener asistío, nel añu 2009, a una de les concentraciones delantre de la Xunta d’Obres del Puertu, convocáu pola UNA-Xixón (agora Compromisu), y con presencia de los vecinos del Muselín, de Candás y de grupos ecoloxistes. Y sé que nun pudieron llegar al Tribunal Superior de Xusticia d’Asturies por falta perres, dexando’l testigu a esi grupu d’Equo que, a lo que se ve, sí cuenten con dineru más abondante. El fallu del Tribunal acabamos de conocelu.
Agora, como un Boabdil llorosu, el PSOE anda miagando al Ministeriu d’Industria, en manes del so enemigu secular el Partíu Popular, pa que saquen la pata qu’ellos metieron por facer les coses como avecen: a espaldes del pueblu y con «polvora del Rei», o seya, coles perres nuestres. Un ridículu más qu’apuntar nel Debe del gobiernu Areces y del Conceyu de Xixón de la Felgueroso. Pero eso sí, ensin nenguna autocrítica, nin neguna responsabilidá per parte d’un partíu que sigue gobernando n’Asturies al día de güei. ¡Que los sigan votando…!
