Nun tenía muncha gana de referime al “Honorable” Jordi Pujol porque abúltame que yá la prensa española ta dándo-y abonda ”caña”. Poca cosa pue añadise a toles descalificaciones, merecíes, del que fue Presidente de la Generalitat per una montonera d’años. Anque repúname bastante que, muncha d’esa prensa, aprovechando que’l Piles pasa per Xixón, aprovecha pa descalificar d’una tacada al independentismu en xeneral y al nacionalismu catalán en particular, como si eso del “choricéu” y la sinvergoña fuere patrimonio de races, families o ideoloxíes. Hai “chorizos” nacionalistes, como los hai tamién (a palaes) españolistes o de los de la Tercera Vía, qu’igual ye la Via Llactea.
Nel fondu, lo que más m’enrita del asuntu, cuasi tanto como’l fraude, son toles llecciones morales que tanto don Jordi, como la Ferrusola, tuvieron dándonos estos años. Recuerdo una entrevista que-y ficieron va munchu tiempu a la muyer del Honorable, na que presumía (ye la pallabra esauta) qu’ellos taben mui percima de la xente porque, a parte la moral humana qu’a tolos dirixentes hai que-yos suponer, teníen el plus de les sos creencies relixoses y nelles teníen educao a los sos fíos. Y dicíalo con esa soberbia que tienen los ricos, espurriendo’l pescuezu y mirando penriba’l llombu con superioridá. Bueno, paez que les diches creencies nun taben mui enraigonaes.
Pese a esi choricéu de gran tamañu qu’acaba descubrise, nun puedo dicir, ensin embargu, que nun-y guarde al señor Pujol una cierta simpatía. Igual llamalo simpatía ye demasiao, voi dexalo n’un ciertu reconocimientu, porque creo que xugó un papel importante nos últimos años del franquismu y nel tiempu de la Transición. Un papel, primero, en favor de la democracia a la qu’axudó a trayer, y llueu faciendo posible la gobernabilidá en dalgunes ocasiones en que fizo falta. ¿Qué too ello fue interesao? Seguramente. Pero’l fechu ye que lo fizo y d’esi mou facilitó les coses al conxuntu del País. Nengún políticu fai les coses de mou dafechamente desinteresáu, habrá que pidir, entós, que polo menos valgan pa dalgo.
Discútese agora el cómo va a repercutir tou esti enguedeyu nesos planes llamaos “soberanistes” y nel futuru del nacionalismu en Cataluña. A la vista los datos que se nos ufierten y lo que podemos deducir nosotros, a min dame la impresión que’l nacionalismu catalán tocó techu, dicho seya con tola prudencia que correspuende. Seguro que cuando se celebre la próxima Diada saldrán a la cai cientos de miles de persones, munchos pidiendo la independencia y otros otres coses, pero eso son un poco fueos d’artificiu. Los que nun salen tamién son munchos. Y sobre too, paezme que ta perdiéndose un poco esi “álitu” románticu que siempres acompaña a les coses nueves, como ensin dubia ye crear un nuevu estáu con unes bases propies. La “Pujolada” demuestra que poco nuevo hai yá nel mundu, y menos nel mundu de la política y, amás, la xente yá ta un poco farta de que, con tolos problemes qu’hai en Cataluña, de lo único que se fale seya del soberanismu. Creo que nes prósimes eleiciones, qu’igual tienen qu’adelantase, ERC va a ganar votos, pero van ser los que pierda CiU, y la suma de dambos van quedar estancaos. Pero, en fin, esi ye otru tema que nun hai por qué adelantar. Lo d’agora ye la constatación de que ningún títulu pue facer “Honorable” a una persona. Namás la so calidá humana, cosa que nesti casu nun esistió.
