close
La Selmana Negra 2014

La Selmana Negra 2014

2014-07-05La Selmana Negra 2014390Visitas

LNE GIJON

Como les sempiternes andarines, torna la Selmana Negra a asitiase nun requexu de Xixón. Siempre embaxo les mesmes premises: discutida y discutible. Tol mundu diz querela muncho pero naide la quier cerque d’onde vive. Bueno, igual dellos comerciantes que ven medrar el negociu.

Esti añu enteréme qu’empezaba pola música. Paez imposible que, na llende de los conceyos de Villaviciosa y Xixón, na carretera del Curbiellu a Pión, a munchos quilómetros del so asitiamientu, siéntase’l “tachum, tachum” de la Feriona. Compadezo a los que viven al llau. Dalgún día habrá de facese un estudiu sociolóxicu sobre’l gustu pol ruíu de los asturianos, dende los que falen al alto la lleva nos chigres que nun te dexen conversar, hasta l’altor de la música en romerías o verbenes ensin nengún respetu pa los que quieren descansar. Debe ser que colos años un vuélvese más quisquillosu, pero ca día me repunen más los ruidosos.

Vi llueu una semeya del “corte de la cinta”, onde nun sé mui bien por qué figuraba Tini Areces ente organizaores y financiaores (l’ayuntamientu). ¿Qué pintaba ellí’l senador xixonés? Si-y presta dir que vaiga como un más y se dexe de “chupar” cámara agora que yá nun ta d’actualidá, a nun ser que ponga perres del so bolsu, que nun creo.

Diz la propaganda que van facese más de 200 actos culturales al rodiu de la Feriona. Si lo dicen ellos será verdá, pero ¿nun sería meyor facer media docena namás, y un poco meyores? Ye como aquel compañeru de trabayu que yo tenía, que prefería 50 botelles de Casera qu’una de Champán francés. Bueno, si ye por quitar la sede…

En fin, que torna la Selmana Negra y preséntense llibros que nun són de novela negra, y vien una carrapotada d’escritores que nun conoz naide, y danse unos premios que nun se sabe quien vota, y hai churros, y perritos calientes y noria xigante…. Ya sabes, la Selmana Negra, una noveda.

 

.