La cultura d’un pueblu, d’un país, ye lo que-y da sentíu propiu a esi pueblu o a esi país. La razón de qu’esista, por exemplu, una Xunta Xeneral del Principáu, onde s’abelluguen los políticos asturianos pa facer proyeutos y dictar lleis, tien sentíu porque esiste una cosa llamada «pueblu asturianu» qu’un día llonxanu, allá pel sieglu XIV, la punxo a funcionar como una Xunta de Conceyos. Un «pueblu asturianu» cuyu orixe vien de mui lloñe y que, a traviés d’una riestra d’elementos en común, llegó hasta los nuestros díes pa da-y esi sentíu del que falo a unes instituciones que si non, nun tendríen xustificada la so esistencia. Esos elementos comunes que faen que güei, y pesie a too, sigamos siendo una comunidá diferenciada sobre la qu’unos políticos exercen la so misión, son los que formen la cultura, nel sen ampliu de la pallabra, qu’endolcaría a la llingua, los vezos, xuegos, cancios, drechu consuetudinariu, arquiteutura… La nuestra cultura, la cultura asturiana. Meyor o peor, eso da igual, pero la nuestra.
Esa cultura nuestra, con grandes dificultaes, llogró dir faciéndose un sitiu na sociedá. Llogró dir creando una mínima estructura industrial pa poder sobrevivir ensin grandes axudes. Dende llueu, nenguna estatal, a pesar de que los asturianos pagamos relixosamente los impuestos al Estáu central. Y poques, en comparanza con les d’otres comunidaes, per parte de los políticos asturianos. Pero ye llegáu esti momentu en que, lo poco que diba quedando d’esa pequeña estructura industrial, ta a piques de
desapaecer.
Les editoriales tán zarrando. Los circuitos de distribuición y les llibreríes especializaes tamién. La prensa qu’emplega la nuestra llingua propia, tanto la escrita como la dixital, ta esmuciéndose. Les asociaciones qu’enantes con modestia y esfuerciu facíen concursos, y publicaben dalgún llibru, tienen que dexar de facelo. Les empresines que trabayaben nel mundu audiovisual ven condenáu’l so llabor, fundamentalmente pol recorte na RTPA. Los grupos profesionales de teatru plantéguense la so desapaición, como por exemplu «Margen», fartucos de falta d’axudes y d’una política teatral discriminatoria, onde ellos nun puen actuar n’otres comunidaes, que zarren files colos suyos, y equí tol mundu de fuera ye bien recibíu… En fin, podríemos siguir col repasu pero la idea xeneral ya ta espuesta: nun tiempu record, tou aquel esfuerciu de llevantar, con abondos pilancos, les bases d’una industria cultural asturiana, ta esbarrumbando. Ta viniéndose abaxo. Y ello ye porque esta clas política, ignorante y antiasturiana, piensa que too eso nun ye importante. Que da igual d’ónde se recorte, lo que s’elimine. Ensin dase cuenta de que tán acabando colo que da sentíu a esti País. Lo que fai que nosotros nun seyamos, con tolos respetos, nin extremeños, nin catalanes, nin andaluces, sinón otra cosa. Nin meyor, nin peor. Otra cosa. Y eso que fai que seyamos «otra cosa», ye que lo tán llogrando eliminar, silenciosamente,nun sé si por ignorancia o porque quieren «uniformamos» pa gobernar más fácilmente. Pero eso sí, sapozando les poques perres qu’hai pa cultura en proyeutos faraónicos, como lo de la Laboral, o despilfarrándolo n’asuntos como’l Niemeyer ensin nengún control públicu.
Hai que salvar la industria cultural asturiana, porque nello nos va la nuestra propia identidá. Ye perimportante facelo cola minería, la siderurxa y toles potencialidaes que tenemos o podamos tener. D’ello yá s’ocupen abondamente los sindicatos, con manifestaciones, marches a Madrid, y parapetos nes autovíes. En cambiu nunca nun s’ocuparon de defender otra cosa que, igual dende’l puntu de vista económicu nun ye tan importante, pero que ye la que da sentíu a lo que somos, a lo que nos llamamos, a la herencia que recibimos: la pequeña pero imprescindible industria cultural asturiana. Da-y la espalda, escaecese d’ella ye, amás de desdexar a un sector productivu que tamién crea trabayu, abandonar esa identidá que munchos llevamos con arguyu: ser asturianu.
