Nel añu 1885, na llamada Conferencia de Berlín, los paises europeos, les vieyes utres sanguinaries, repartiéronse’l continente africanu pa poder colonizalu más fácilmente y repartise les sos riqueces. Punxeron un mapa xeográficu d’Africa enriba una mesa y trazaron unes llinies arbitraries según-yos convenía. El resultáu fue que surdieron unos paises artificiales ensin tener en cuenta les poblaciones y les circunstancies históriques, de tal mou que xuntaron en dalgunos a etnies secularmente enfrentaes ente sí, mentanto n’otros separtaben a poblaciones hermanes obligándoles a vivir ca una nun país distintu. El fracasu fue ñidiu y entovía güei África ta pagando aquel repartu colonial ensin sentíu que, per otru llau, nun sirvió más qu’enfrentar a unos paises europeos con otros, lo que dexeneró na Primer Guerra Mundial.
Valme esti exemplu, ñidiamente descomanáu, pa salir al pasu d’una ocurrencia del Gobiernu del Principáu d’Asturies, presidíu por don Javier Fernández, na que pretende crear, sobre’l mapa, una gran «aria metropolitana» axuntando embaxo a un mesmu paragües a tola zona central d’Asturies: Xixón, Uviéu, Avilés, les Cuenques… La ocurrencia ye mayor cuando, yá de mano, nun hai unes negociaciones previes colos ayuntamientos implicaos, sobre too col de Xixón, la mayor población d’Asturies, pa debatir l’asuntu.
Y ye que, nun sé n’Uviéu, pero en Xixón esiste secularmente una fonda desconfianza hacia la capital y tolo que nella
cinca a la ciudá del Piles. El centralismu carbayón, como’l madrileñu respeutu al Estáu, tiense demostrao a lo llargo los años como cualquier pue consultar nes hemeroteques, o lleendo los editoriales de Carantoña y agora l’espaciu selmanal del amigu Canal n’El Comercio. Xixón nun se fía d’Uviéu. Esto ye asina, preste o nun preste. Poro, tratar d’axuntar los intereses de dambos al rodiu d’una gran «megaciudá» o, como diríemos perequí «ciudadona», ta condergao al fracasu. A ello habría qu’amestar la peculiar idiosincrasia de la xente del Caudal y del Nalón, o d’Avilés, cola so propia visión de les coses y los sos propios intereses particulares, tan respetables como cualisquier otru.
Pero ye que, amás, el tiempu de les grandes «ciudadones» ya pasó. Agora tiéndese más a la descentralización, a los nucleos habitables, a la vuelta -anque seya como recréu- al campu. Concentrar ciudaes pue aforrar dalgunos recursos, pero a cambiu de faceles más invivibles, más inhóspites. Asturies nun ye tan grande como pa permitise ocupar cuasi tol so espaciu central con un aria metropolitana que, amás, dexaría una vuelta más, desprotexíes a les dos «ales» y en francu retrocesu respeutu al restu.
Esta ocurrencia nun ye nueva. Cada ciertu tiempu, como los estorninos, vuelve a dar xuegu pa entretener a la xente y paecer que se ta faciendo lo que nun se ta faciendo. Como lo de fusionar el Sporting y l’Uviéu nun gran equipu rexonal y que xugaren, por exemplu, n’Avilés. En fin, habrá unos cuantos paliques. Llevarán el carru d’un llau pa otru, y finará la cosa en cuantes haya dalgún otru tema de mayor importancia. Espero que nun sirva pa engafentar más les coses ente los supuestos suxetos del plan, tal y como pasó cola conferencia de Berlín.
