Dicía n’otru pequeñu comentariu de va tiempu, tocante a la presentación de los estatutos de «Sortu» pa poder participar nes eleiciones municipales vasques, que nun se puen modificar les regles a metada d’una partida y, nesti casu, pidir a la coalición más coses que les que la llei, nel momentu del actu, recueye. Llamentablemente’l tiempu vieno a dame la razón y el Tribunal Supremu nun aceuta esos estatutos pese a que, polo que yo sé, respeten dafechu la lletra de la Llei de Partíos. Y ehí ye onde s’afaya’l ñudu de la custión: qu’agora la lletra, o seya la lliteralidá de la llei nun abasta. Y asina pasa a xulgase tamién «la intención» de los que pretenden presentase a diches eleiciones.
N’efeutu, los aconceyaos embaxo’l nome de «Sortu», cumplen lo que se pide na Llei de Partíos, y condenen la violencia, ya inclusive la de la banda terrorista ETA espresamente, lo cual ye lo que se pide. Pero agora una parte del Tribunal Supremu, y hai que recalcar qu’hai voces disidentes, vienen a dicir que sí, que la condenen, pero que ye cola boca pequeña. Que ye por que tan «obligaos», pero que la so intención ye siguir trabayando pa ETA, y que son una continuación de Batasuna y etc. etc.
Evidentemente toos cumplimos les lleis porque «tamos obligaos». Les lleis nun satisfacen a toos. A min hai dalgunes
que me paecen permal pero, guardándonos la nuestra disidencia facemos por cumpliles. Si nos fueren a ver «la intención» podríen metenos na cárcel. Lo más que se pue pidir a los ciudadanos respeutu a les lleis ye que les respeten y les cumplan, lo de les intenciones queda pal ámbitu priváu o pa les conversaciones de chigre. Exemplu: acaba regulase por llei que la velocidá másima pa circular son los 110 kilómetro por hora. ¿Qué ye, que podríen parame cuando circulo a 110 y dicime?: «Sí, usté va a 110 pero prestaría-y dir a 150. Asina que voi multalu». Salvando la coña, lo de «Sortu» ye daqué asemeyao.
Mención aparte pa la campaña mediática de presión a los xueces, desixendo coses que la llei nun prevee, como esos «plazos de tiempu» pa ver si los sos intenciones son bones, o la necesidá de «pidir perdón» a les víctimes, coses de calter moral que nun tan llexislaes. Y si non, que se meta too nuna llei, votada nel parllamentu, onde se diga que los que quieran presentase a les eleiciones tienen que pidir perdón, nun figurar en llistes anteriores, xurar ante el Corán y dir de tarabica. Nun quiero banalizar el tema, pero ye que les lleis nun puen ser de «chicle» y hai que cumplir, namás (y na menos) lo qu’ellí se diz. L’otro supón una inseguridá xuridica que nun ye propia d’un país civilizáu, al marxe de lo qu’opinemos sobre’l que pretende a acoyese a elles, qu’esi sedría otru cantar.
P.S. Mientres escribo esto, sal un comúnicáu d’ETA onde vuelve a dicir babayaes y amosar el nulu conocimientu de la realidá del país. Too eso de «la verificación internacional» son «mandangues» que nunca nun van salir alantre. Lo que daveres tendría que facer ye desapaecer y, si acasu, falar de qué pasaría colos presos y col restu la banda que nun tuviere delitos de sangre. Lo demás, paezme a min qu’a naide interesa.
