Güei quiero principiar a falar de dalgunos personaxes, más o menos conocíos, que me caen dafechamente bien y que, amás, lleven el mio nome (o meyor, yo’l d’ellos). Esa ye la suerte de tener un blogue, qu’un pue escribir sobre coses que n’otru sitiu nun te permitiríen. El primer Vicente de la coleición ye l’almiráu Vincent Price. Ún de los mios «malos» favoritos.
Quiciás munchos mozos/es nun oyeron falar d’elli: un actor de películes de serie «B», famosu polos sos personaxes abegosos en «pelis» de terror. Home cultu (llicenciáu en Belles Artes ya Historia del Arte), dotáu d’una perguapa voz que n’España nun fuimos a oyer polos «doblaxes», perfeutu conocedor de la obra d’Edgar Allan Poe, trabayó en más de cien películes y especializóse en papeles rellacionaos colos cuentos del so autor favoritu: El Cuervu; La cayía de la casa d’Usher; La mázcara de la muerte roxa; El pozu y el péndulu, etc. Siempre elegante y cultiváu, tresmitió’l so curiosu calter y personalidá a tolos personaxes qu’interpretó, cargaos del so finu sentíu del humor. Entovía lu recuerdo na vieya sala del cine Albeniz, enduvielláu na picalina la butaca, viendo «Los crímenes del Muséu de Cera» en 3D. tremando y gociando al empar. Un monstruu en tol xacíu de la pallabra.
En 1982 Tim Burton, fiel almirador suyu, dedicó-y un simpáticu curtiumetraxe d’animación, de títulu Vincent, nel qu’un neñu mui especial quier ser como Vincent Price.
Vincent Price, un de los meyores «malos» del cine universal, morrió en Los Ánxeles en 1993 a los 82 años.
